La Tgira da monuments ed il Servetsch archeologic dal Grischun organiseschan mintga onn en collavuraziun cun la Protecziun da la patria dal Grischun e cun organisaziuns partenarias ils Dis europeics dal patrimoni. Las occurrenzas da quest onn, che han lieu ils 9 ed ils 10 da settember en l'entir chantun, porschan la pussaivladad da reflectar davart l'utilisaziun persistenta da resursas e da tgirar la discussiun davart la cultura architectonica tranter la populaziun e persunas spezialisadas.

Quest onn stattan ils Dis europeics dal patrimoni en Svizra sut il motto «Reparar e reutilisar». Ensemen cun il Servetsch archeologic dal Grischun, cun la Protecziun da la patria dal Grischun sco er cun organisaziuns partenarias externas ha la Tgira da monuments dal Grischun organisà occurrenzas attractivas en tut las regiuns dal chantun. Tut las persunas interessadas èn cordialmain envidadas. Il tema da quest onn na pudess betg esser pli actual. En il center stat numnadamain la dumonda, co che nus pudain prestar ina contribuziun optimala a favur d'ina societad netto nulla ed a medem temp proteger la substanza istorica da noss patrimoni architectonic. Ils Dis dal patrimoni focusseschan sin la persistenza da nossa substanza architectonica istorica e sin la dumonda, co che nus giain enturn cun las resursas ch'èn stgarsamain avant maun.

La sonda, ils 9 da settember 2023, cumenzan ils Dis europeics dal patrimoni en la Tumleastga, pli precis a Rodels. Sin in plaz fiera sper la chasa da scola pon ins observar differentas mastergnantas e mastergnants che pratitgeschan lur artisanadi istoric. Plinavant ha lieu in forum cun referats davart ils temas reparar, reutilisar e construir vinavant. Natiralmain na dastga er betg mancar ina visita guidada dal vitg. L'Uniun da giuventetgna da la Tumleastga Dador vegn a porscher delicatessas culinaricas a las persunas interessadas. Er ulteriuras occurrenzas, tranter auter en l'Engiadina, empermettan invistas interessantas.

Las occurrenzas da la dumengia, ils 10 da settember 2023, vegnan organisadas tranter auter da las plaivs da Cazas, da Favugn e da Tumleastga. Ma er a San Murezzan, a Müstair ed a Zizers datti da scuvrir chaussas interessantas. Il program cumplain vegn adina actualisà e stat a disposiziun en l'internet sut www.kulturerbe-entdecken.ch. Las organisaturas ed ils organisaturs sa legran da dastgar beneventar bleras visitadras e blers visitaders a las occurrenzas.

Agiunta:

Program

Ulteriuras infurmaziuns:

www.kulturerbe-entdecken.ch

Infurmaziuns:

Simon Berger, manader da la Tgira da monuments dal Grischun, Uffizi da cultura, e‑mail Simon.Berger@dpg.gr.ch

Responsabladad: Tgira da monuments dal Grischun / Uffizi da cultura