La fundaziun Promoziun Sanadad Svizra ha distinguì l'Uffizi da construcziun bassa dal Grischun (UCB) cun il label «Friendly Work Space». En l'entira Svizra è il UCB il 100avel ed en il chantun il quart manaschi che survegn questa distincziun. Ils manaschis distinguids cun quest label s'engaschan sistematicamain per bunas cundiziuns da lavur e per collavuraturas e collavuraturs sauns.
Collavuraturas e collavuraturs sauns èn la clav per il success. Pli e pli interpresas revegnan perquai ad in Management da sanadad sistematic en il manaschi (MSM). Er l'Uffizi da construcziun bassa dal Grischun (UCB) s'engascha a lunga vista ed en moda persistenta a favur dal MSM. Pervia da la gronda diversitad da professiuns tar il UCB resortan pretensiuns e sfidas multifaras.
Ina investiziun per il futur
In MSM sistematic è ina investiziun a lunga vista che sa paja tras ina cuntentientscha pli gronda da las collavuraturas e dals collavuraturs, dapli capacitad da prestaziun, main absenzas ed in meglier image da l'interpresa. En vista a la mancanza da persunas spezialisadas ch'è actualmain inevitabla, è la distincziun cun il label «Friendly Work Space» da la Promoziun Sanadad Svizra in pass strategic impurtant per far frunt cun success a las sfidas dal futur e per posiziunar il UCB sco plaz da lavur attractiv. «Nossa finamira n'è betg mo quella, da pledentar cun il label novas collavuraturas potenzialas e novs collavuraturs potenzials, mabain er da restar attractivs per nossas collavuraturas existentas e noss collavuraturs existents», di l'inschigner chantunal Reto Knuchel.
La via al label
La via a la certificaziun cumenza cun in'analisa dal stadi actual. Questa analisa sa cumpona da sis criteris da qualitad dal MSM. Ils criteris vegnan registrads e controllads sistematicamain – per exempel MSM e politica da l'interpresa, aspects dals fatgs da persunal e da l'organisaziun da la lavur sco er responsabladad sociala. Il MSM sto esser integrà en sistems da management e vegnir chapì sco incumbensa directiva. In'ulteriura premissa per la distincziun èn structuras da lavur che promovan la persunalitad e la sanadad.
Proxima valitaziun en 3 onns
Bleras mesiras ch'èn gia vegnidas realisadas, han procurà ch'il UCB ha survegnì questa distincziun. La distincziun n'è dentant betg mo ina paja per questas stentas, mabain er in impuls ed in'obligaziun da sa sviluppar vinavant. Il label «Friendly Work Space» resta valaivel mo per 3 onns. Suenter sa suttametta il UCB danovamain als criteris da la Promoziun Sanadad Svizra per vegnir certifitgà per 3 ulteriurs onns. Grazia al giudicament intensiv ha il UCB pudì eruir cleramain, nua ch'el ha anc potenzial da meglieraziun. Là vegnan ussa prendidas cleras mesiras.
Dapli infurmaziuns:
Infurmaziuns:
Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 15.00 fin las 16.00), e‑mail Reto.Knuchel@tba.gr.ch
Responsabladad: Uffizi da construcziun bassa