La Regenza grischuna ha nominà Marco Blumenthal sco nov manader da l'Uffizi da persunal. El vegn a surpigliar questa funcziun il 1. da schaner 2024.

La Regenza ha elegì Marco Blumenthal, da Lumnezia, domicilià a Malans, sco nov manader da l'Uffizi da persunal. El surpiglia questa funcziun da Roger Danuser, che maina l'uffizi en moda interimistica dapi il mars 2023.

Marco Blumenthal ha rimnà durant passa 20 onns experientschas en il sectur da las resursas umanas. Dapi l'onn 2001 ha el lavurà en differents gremis spezialisads ed en diversas posiziuns da cader entaifer il sectur HR da la Credit Suisse, actualmain per la divisiun Swiss Bank cun dapli che 5000 collavuraturas e collavuraturs. Marco Blumenthal ha fatg in diplom da master (MAS) en Human Capital Management a la Scola auta turitgaisa per scienzas applitgadas (ZHAW) sco er in diplom en economia da manaschi SAS a la Scola auta da tecnica ed economia (SATE) Cuira.

L'Uffizi da persunal dal Grischun è il post chantunal spezialisà per dumondas da persunal. Sco uffizi interdisciplinar s'occupa el da tut ils 39 posts da servetsch e secretariats dals departaments da l'administraziun chantunala cun sias var 3800 collavuraturas e collavuraturs. El emetta mintga onn passa 900 contracts da lavur e passa 55 000 rendaquints da salari. Ultra da las incumbensas centralas, sco la recrutaziun, la scolaziun e furmaziun supplementara, il management dals salaris e da las uras sco er il dretg da persunal, stat l'Uffizi da persunal mintga di en il servetsch da superiuras e superiurs sco er da collavuraturas e collavuraturs.

Fotografias agiuntadas:

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 11.00 fin las 14.00), e‑mail Martin.Buehler@dfg.gr.ch

Responsabladad: Regenza