En il rom dal project «Transfer da savida vischnancas» ha l'Uffizi da vischnancas (UV) publitgà tschintg videos explicativs che duain promover l'interess per la politica communala.
Ils ultims decennis èn las incumbensas da las vischnancas sa midadas e daventadas cleramain pli multifaras, ma er pli pretensiusas. Da las autoritads ed administraziuns communalas spetgan ins ina gronda prontezza da prestar servetschs ed in adempliment da las incumbensas qualitativamain irreproschabel. A medem temp sa reducescha tendenzialmain l'identificaziun da la populaziun cun la vischnanca da domicil. Sco consequenza sa diminuescha en blers lieus la prontezza da surpigliar in uffizi politic en la vischnanca. A lunga vista po ina mancanza d'ina nova generaziun politica sin plaun communal periclitar il mantegniment da l'entir sistem democratic direct, federalistic cun l'idea da milissa francada.
Perquai ha la Regenza incumbensà il UV la primavaira 2022 cun il project «Transfer da savida vischnancas». Cun diversas mesiras duai vegnir rinforzada la conscienza en la societad davart l'impurtanza da la vischnanca sco plaun statal ch'è francà localmain ed uschia er promovì l'interess per la politica communala.
Lantschà il project parzial «Videos explicativs»
Sco emprim project parzial ha il UV laschà producir ina retscha da videos explicativs. Quels decleran la moda da funcziun da las vischnancas e dattan infurmaziuns impurtantas a persunas novelegidas u che s'interessan per in uffizi. Ils videos explicativs duain promover en general l'interess per l'instituziun ed effectuar in interess ed engaschament politic pli ferm.
Emprims tschintg videos explicativs davart incumbensas ed organs
Ils videos explicativs duran tranter duas e trais e mez minutas ed èn formulads en lingua simpla. Plinavant èn tut ils videos disponibels en las trais linguas chantunalas. Ils emprims tschintg videos cuntegnan ils suandants temas:
Utilisaziun multifara
Ils videos pon ins guardar sin la pagina d'internet dal UV sco er sin il chanal da YouTube dal chantun Grischun. Las vischnancas grischunas vegnan intimadas da publitgar quests videos sin lur paginas d'internet ubain d'utilisar ils videos er en il rom d'atgnas occurrenzas.
Infurmaziuns:
- Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01, e‑mail Martin.Buehler@dfg.gr.ch
- Simon Theus, substitut dal manader da l'Uffizi da vischnancas, tel. +41 81 257 23 87, e‑mail Simon.Theus@afg.gr.ch
Responsabladad: Departament da finanzas e vischnancas