La dumengia d'elecziun, ils 22 d'october, vegnan ils resultats intermediars publitgads a partir da las 12.00 mintga 20 minutas en l'internet, quai sut www.gr.ch/nrw (elecziuns dal Cussegl naziunal) sco er sut www.gr.ch/srw (elecziuns dal Cussegl dals chantuns). Plinavant communitgescha il Servetsch da communicaziun ils resultats sin social media cun ils hashtags #ElecziunsGR #WahlenGR #ElezioniGR.
La Chanzlia chantunala dal Grischun ha cumenzà gia a l'entschatta da l'onn cun las preparativas per las elecziuns dal Cussegl naziunal e dal Cussegl dals chantuns 2023. Latiers tutgan cunzunt las instrucziuns da las vischnancas sco er da las commembras e dals commembers dal biro electoral chantunal cun las cussegliadras ed ils cussegliaders electorals. Avant las elecziuns han gì lieu tests correspundents. Plinavant han stuì vegnir controlladas, stampadas e tramessas tut las glistas electoralas. Ultra da las numerusas funcziunarias e dals numerus funcziunaris communals èn engaschads il di d'elecziun sco tal er las collavuraturas ed ils collavuraturs dal biro electoral chantunal. Ellas ed els sustegnan las vischnancas cun dar infurmaziuns al telefon. Quest servetsch duai gidar ch'ils resultats en las vischnancas vegnian eruids ed endatads correctamain. Ils cedels electorals inoltrads per las elecziuns dal Cussegl naziunal sco er ils resultats communals da las elecziuns dal Cussegl dals chantuns vegnan endatads da las vischnancas en in program chantunal che serva ad eruir ils resultats. Per ils resultats che vegnan endatads da las vischnancas èn responsabels unicamain ils biros electorals communals.
Resultats intermediars e finals dal Grischun sin www.gr.ch
Il biro electoral chantunal lavura la dumengia, ils 22 d'october 2023, en la Chasa grischa a Cuira. La Chasa grischa n'è betg accessibla a persunas externas. Las medias e la publicitad vegnan orientadas periodicamain davart il stadi da las elecziuns. Ils resultats intermediars ed il resultat final vegnan tramess al Center da medias en l'edifizi da Radiotelevisiun Svizra Rumantscha (RTR) a Cuira sco er publitgads a partir da las 12.00 mintga 20 minutas en l'internet, quai sut www.gr.ch/nrw (elecziuns dal Cussegl naziunal) e www.gr.ch/srw (elecziuns dal Cussegl dals chantuns). Cun resalva che la dumbraziun haja lieu sco planisà, pon ins far quint ch'ils resultats finals sajan avant maun il suentermezdi vers saira.
Sin X, Facebook, Instagram e LinkedIn annunzia il Servetsch da communicaziun ils resultats durant il di d'elecziun cun ils hashtags #ElecziunsGR #WahlenGR #ElezioniGR..
Infurmaziuns:
Claudia Hartmann Lütscher, vicechanceliera, Chanzlia chantunala dal Grischun, tel. +41 81 257 22 22 (cuntanschibla da las 14.00 fin las 15.00), e‑mail Claudia.Hartmann@staka.gr.ch
Responsabladad: Chanzlia chantunala