La Regenza ha concedì a la Fundaziun Provediment da sanadad Engiadin'Ota (SGO) ina contribuziun chantunala da maximalmain 212 000 francs al project digital «Rinforzament dal skill-grade-mix en instituziuns da sanadad grischunas tras l'applicaziun da robotica da servetsch (SGM-GR)». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs totals dal project importan var 676 100 francs.

En il rom dal project vul la SGO rinforzar l'uschenumnà skill-grade-mix da las forzas da tgira spezialisadas tras l'applicaziun da robotica da servetsch. Il skill-grade-mix gida ad eruir las qualificaziuns actualas da las collavuraturas e dals collavuraturs en l'ospital, da las preschentar graficamain, da las valitar e da mussar tge incumbensas che pon vegnir surpigliadas da collavuraturas e collavuraturs pli qualifitgads e tgeninas da collavuraturas e collavuraturs main qualifitgads. Tut en tut vul la fundaziun meglierar qua tras la qualitad da la tgira sco er far frunt a la mancanza da forzas da lavur. Las enconuschientschas eruidas ensemen cun las perscrutadras ed ils perscrutaders da la Scola auta spezialisada dal Grischun tras il project cun il roboter «Lio» vegnan rendidas accessiblas a tut las instituziuns da tgira dal chantun Grischun cun dis regulars da las portas avertas e cun ina roadshow en tut las regiuns.

Ulteriuras infurmaziuns: https://grdigital.digital/

© F&P Robotics AG

En cumparegliaziun cun la creschientscha da la populaziun prognostitgada èn las zonas d'abitar, maschadadas e da center (ZAMC) da la vischnanca da Laax memia pitschnas. Igl exista uschia in basegn cumprovà per terren da construcziun disponibel. Quai è resultà d'ina examinaziun da las zonas da construcziun areguard la grondezza, la dimensiun e l'utilisaziun en connex cun la realisaziun da la Lescha federala davart la planisaziun dal territori (LPT1) e dal Plan directiv chantunal Abitadi (PDChant-A).

Il focus da la planisaziun dal territori da la vischnanca è correspundentamain drizzà sin la preparaziun e sin la mobilisaziun da reservas da zonas da construcziun. En lieus betg adattads per ina densificaziun duain ultra da quai vegnir reducidas las ZAMC. Questas mesiras da planisaziun èn resultadas en ina revisiun parziala da la planisaziun locala, ch'è vegnida concludida da la vischnanca da Laax ils 14 da settember 2022. La Regenza constatescha, che las pretensiuns da la LPT1 sco er dal PDChant-A èn ademplidas, ed approvescha questa revisiun da la planisaziun locala.

© Comet Photoshopping ScRL, Dieter Enz