Las instituziuns che porschan ina scolaziun pratica per il persunal da tgira en il Grischun, duain survegnir pli autas contribuziuns per la scolaziun pratica. E tgi che absolva ina scolaziun da tgira ad ina scola spezialisada superiura (SSS) u ad ina scola auta spezialisada (SAS), duai pudair far quint en l'avegnir cun ina paja pli auta e cun contribuziuns da sustegn. La Regenza ha deliberà ina revisiun parziala respectiva da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira. Il Cussegl grond vegn a tractar questa fatschenta previsiblamain il favrer 2024.
Tras las contribuziuns da la Confederaziun e dals chantuns als custs da la scolaziun pratica duai vegnir promovì in aut standard tar il persunal da tgira. La finamira èsi da garantir er vinavant ina buna qualitad da la tgira en il Grischun.
Ils 28 da november 2021 han las votantas ed ils votants svizzers acceptà a l'urna cun ina maioritad da 61 pertschient l'iniziativa «Per in sectur da tgira ferm (Iniziativa da tgira)». Il nov art. 117b da la Constituziun federala pretenda, ch'ils chantuns e la Confederaziun renconuschian e promovian la tgira sco element impurtant dal provediment da la sanadad.
L'access ad ina tgira suffizienta d'auta qualitad duai vegnir garantì per tuttas e tuts. La Confederaziun ed ils chantuns ston procurar, ch'i stettia a disposiziun in dumber suffizient da tgirunzas diplomadas e tgirunzs diplomads. Ultra da quai duain las persunas ch'èn activas en la tgira pudair lavurar confurm a lur scolaziun ed a lur cumpetenzas, per che la qualitad da la tgira saja garantida. En il rom da la realisaziun da l'iniziativa da tgira ha la Confederaziun lantschà en in'emprima etappa l'uschenumnada offensiva da scolaziun. Cun quella duai vegnir prendida per mauns la mancanza da tgirunzas e tgirunzs.
Cun la revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas) che la Regenza ha deliberà, vegnan las prescripziuns da la Confederaziun realisadas.
Las contribuziuns chantunalas als custs da scolaziun vegnan regladas da nov
Regladas vegnan las contribuziuns dal chantun als custs da scolaziun dals furniturs da prestaziuns, la concessiun da contribuziuns a las scolas spezialisadas superiuras (SSS) per promover la scolaziun e la concessiun da contribuziuns da scolaziun a las studentas ed als students da tgira a scolas autas spezialisadas (SAS) ed ad SSS. La Confederaziun sa participescha cun fin 50 pertschient als custs chantunals. Tenor la lescha federala vegn l'offensiva da scolaziun promovida tut en tut durant 8 onns cun fin 1 milliarda francs tras la Confederaziun ed ils chantuns.
A chaschun da l'offensiva da scolaziun sa restrenscha la Confederaziun sin la promoziun dal stgalim terziar (SSS ed SAS). Il chantun è sa decidì da conceder contribuziuns er als ospitals, a las chasas da persunas attempadas e da tgira, als servetsch da la tgira ed assistenza a chasa ed a las tgirunzas ed als tgirunzs renconuschids, quai per ils custs da la scolaziun pratica sco spezialista u spezialist da sanadad cun attestat federal da qualificaziun (AFQ). Uschia duai er vegnir garantida ina purschida suffizienta da plazs da scolaziun per absolventas ed absolvents da la scolaziun sco spezialista u spezialist da sanadad AFQ.
Aguinta:
Missiva
Infurmaziuns:
President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 13.00 fin las 15.00), e‑mail Peter.Peyer@djsg.gr.ch
Responsabladad: Regenza