La Regenza ha deliberà la nova strategia da HR per ils onns 2024 fin 2028. Quella furma il rom per dumagnar las sfidas sin il martgà da lavur e per augmentar l'attractivitad da l'administraziun chantunala sco patruna per collavuraturas e collavuraturs existents e novs. La realisaziun da la strategia da HR gida l'administraziun chantunala ad ademplir optimalmain sias incumbensas a favur da la populaziun e da l'economia.

Ils fatgs da persunal en l'administraziun chantunala dal Grischun èn confruntads cun bleras sfidas. Il svilup demografic, la digitalisaziun che avanza svelt ed ils process da transfurmaziun che vegnan accelerads tras quai, sco er l'interess per novs models da lavur – quai èn mo intginas da las sfidas che pretendan in svilup cuntinuant, er en il sectur dals fatgs da persunal.

«Ensemen per il Grischun»
Cun questa visiun duain vegnir stgaffids conturns da lavur che tegnan quint da las sfidas sin il martgà da lavur. La nova strategia da HR promova la diversitad e l'inclusiun, pussibilitescha l'innovaziun e garantescha servetschs d'auta qualitad. La finamira da questa nova strategia èsi, che l'administraziun chantunala possia rinforzar sia posiziun sin il martgà da lavur e ch'ella possia tegnair las collavuraturas ed ils collavuraturs existents sco er gudagnar nov persunal qualifitgà.

Mesiras multifaras
Las mesiras elavuradas tanschan davent dal repassament da la strategia da recrutaziun da persunal sur mesiras per promover la cumpatibilitad da la professiun cun la famiglia ed il temp liber fin al svilup dal persunal ed a la promoziun da persunas talentadas. Plinavant duai vegnir augmentada l'effizienza e la qualitad dals process da HR e per exempel vegnir installà in model da cussegliar il persunal cun cleras finamiras. Tut en tut èn vegnidas elavuradas 13 mesiras che vegnan realisadas durant ils proxims 5 onns.

Agiunta:

Strategia da HR da l'administraziun chantunala dal Grischun 2024–2028

Infurmaziuns:

• Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 12.00 fin las 13.30), e‑mail Martin.Bühler@dfg.gr.ch
• Marco Blumenthal, manader da l'Uffizi da persunal, tel. +41 81 257 45 06 (cuntanschibel da las 08.30 fin las 10.00), e‑mail Marco.Blumenthal@pa.gr.ch
• Gino Clavuot, manader dal project Strategia da HR, Uffizi da persunal, tel. +41 81 257 89 95 (cuntanschibel da las 08.30 fin las 10.00), e‑mail Gino.Clavuot@pa.gr.ch