La Cuminanza da lavur da las regiuns alpinas (ARGE ALP) tschertga – en il rom d'ina concurrenza – projects che promovan l'utilisaziun persistenta da l'aua en il territori alpin. Annunzias pon vegnir inoltradas fin il 1. da zercladur 2024. Tut en tut vegn surdada ina summa da 12 000 euros.
L'onn 2024 vegn la ARGE ALP presidiada dal chantun Tessin che ha fixà la protecziun dal clima e las sfidas per dumagnar la crisa climatica sco tema directiv da quest onn. L'aua sco resursa impurtanta stat bain a disposiziun en abundanza en las regiuns da la ARGE ALP. Tuttina è la disponibladad d'aua adina puspè in tema, gist durant temps da gronda setgira. La midada dal clima sa manifestescha numnadamain er en nossas regiuns ed ha consequenzas per tut il territori alpin.
Projects cun utilisaziun persistenta da l'aua en il focus
Il premi da la ARGE ALP da quest onn stat sut l'ensaina d'in consum d'aua spargnus: Co pon ins rinforzar la conscienza per in diever spargnus e responsabel da l'aua?
La finamira è quella da premiar projects spezialmain empermettents ed exemplarics, che promovan la conscienza per l'utilisaziun spargnusa da l'aua. Igl è pussaivel d'inoltrar tant iniziativas da la societad civila (da scolas, uniuns u persunas privatas) sco er mesiras concretas da l'economia (d'interpresas u start-ups) u dal sectur public (d'instituziuns, vischnancas u citads). Las trais meglras iniziativas vegnan premiadas. Tut en tut vegn surdada ina summa da 12 000 euros.
Surdada dal premi a chaschun da la Conferenza da las scheffas e dals schefs da las regenzas da la ARGE ALP
La selecziun dals projects victurs vegn fatga en ina procedura da dus stgalims. Ina giuria regiunala che vegn nominada dals pajais federativs e dals chantuns respectivs sco er da las regiuns respectivas elegia in project victur dal pajais alpin en dumonda. En in ulteriur pass eruescha la giuria internaziunala las victuras ed ils victurs finals. Ellas ed els vegnan envidads l'october 2024 en il Tessin a la surdada dal premi che ha lieu en il rom da la Conferenza da las scheffas e dals schefs da las regenzas da la ARGE ALP.
Inoltraziuns grischunas
Ils projects or dal chantun Grischun pon vegnir tramess fin il 1. da zercladur 2024 a l'adressa dad e‑mail kommunikation@gr.ch. I vegnan resguardads mo projects che adempleschan las modalitads per l'annunzia e che vegnan inoltrads cun ils documents da publicaziun cumplets.
Las directivas, il formular da participaziun, il consentiment per l'elavuraziun da datas sco er ulteriuras infurmaziuns chattais Vus sut www.argealp.org.
Commembers da la ARGE ALP èn il stadi liber Baviera da la Germania, ils stadis federativs Tirol, Salzburg e Vorarlberg da l'Austria, las provinzas autonomas Bulsaun-Tirol dal Sid e Trento sco er la regiun Lumbardia da l'Italia ed ils chantuns Grischun, Son Gagl e Tessin da la Svizra.
Infurmaziuns:
Responsabladad: Cuminanza da lavur da las regiuns alpinas (ARGE ALP)