La Nova politica regiunala da la Confederaziun signifitga per il chantun Grischun in instrument cumprovà ed efficazi per augmentar la valurisaziun e per rinforzar la cumpetitivitad en las regiuns. Ussa ha il program da realisaziun NPR Grischun 2024‒2027 cumenzà. Uschia cuntinuescha il chantun la pratica da promoziun vertenta cumprovada ils proxims 4 onns.
Cun la Nova politica regiunala (NPR) pon vegnir promovids projects innovativs ed orientads a la valurisaziun en ils secturs «Turissem», «Industria ed innovaziun» sco er en la «Economia da furmaziun e da sanadad». Ultra da quai vegnan sustegnids projects che valuriseschan ils potenzials locals e regiunals e rinforzan uschia la capacitad d'innovaziun, la cumpetitivitad e la valurisaziun en las regiuns.
Finanziaziun cuminaivla tras Confederaziun e chantun
La Confederaziun ha approvà il Program da realisaziun NPR Grischun 2024‒2027, elavurà dal chantun en collavuraziun cun las regiuns. Ella metta a disposiziun per quest intent contribuziuns à fonds perdu da stgars 14 milliuns francs sco er emprests federals da 25 milliuns francs . Il chantun prevesa d'impunder tut en tut var 20 milliuns francs per contribuziuns à fonds perdu e sco prestaziun equivalenta als emprests federals per la promoziun da projects. La Confederaziun ed il chantun sa participeschan mintgamai cuminaivlamain a la finanziaziun dals projects.
Sustegnids vegnan ils projects en il senn d'ina finanziaziun da partenza. La premissa è er ch'ils projects sajan intermanaschials e contribueschian al svilup da l'economia regiunala. En il Grischun pon projects da la NPR vegnir promovids en l'entir territori chantunal. Pussaivla è er la promoziun da projects che surpassan il chantun ed il cunfin.
La realisaziun da la NPR vegn coordinada en il chantun Grischun da l'Uffizi per economia e turissem. Ultra da quai stattan a disposiziun cun las sviluppadras regiunalas ed ils sviluppaders regiunals posts da contact regiunals.
Realisà cun success la Nova politica regiunala en il Grischun
Dapi l'onn 2008 presta la NPR en il Grischun contribuziuns impurtantas al svilup da l'economia regiunala. Ella dat impuls e pussibilitescha projects che rinforzan las interpresas, l'innovaziun, la valurisaziun e la cumpetitivitad en las regiuns.
Sur il Program da realisaziun NPR 2020‒2023 èn vegnids promovids 124 projects cun contribuziuns à fonds perdu da tut en tut var 20 milliuns francs. 10 projects d'infrastructura han survegnì emprests federals en l'autezza da tut en tut 19 milliuns francs e prestaziuns chantunalas equivalentas da bundant 4,5 milliuns francs. Dapli che 85 pertschient dals meds finanzials ch'èn stads a disposiziun en la perioda da realisaziun 2020–2023 han uschia pudì vegnir exaurids per promover projects.
Ulteriuras infurmaziuns davart ils projects da NPR promovids chattais Vus en la banca da datas dals projects da regiosuisse, la plattafurma per svilup regiunal en Svizra.
Infurmaziuns:
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 11.00 fin las 12.00), e‑mail Marcus.Caduff@dvs.gr.ch
Responsabladad: Departament d'economia publica e fatgs socials