La Regenza grischuna è vegnida retschavida ier a Son Gagl a chaschun d'in inscunter da lavur cun la Regenza songagliaisa. En il center dals discurs èn stadas tranter auter in'eventuala midada da l'utilisaziun da la pipeline d'ieli mineral da la Svizra Orientala, reducziuns dal pretsch per purschidas extrachantunalas admessas da la tgira d'uffants cumplementara a la famiglia sco er la strategia per utilisar l'intelligenza artifiziala.
La Regenza songagliaisa sut la direcziun dal president da la Regenza Stefan Kölliker ha beneventà oz la Regenza grischuna en la Chasa da la Regenza a Son Gagl per in inscunter da lavur. Fatg part da la delegaziun da Son Gagl han plinavant las cusseglieras guvernativas Laura Bucher e Susanne Hartmann sco er ils cussegliers guvernativs Beat Tinner, Marc Mächler e Bruno Damann ed il secretari da stadi Benedikt van Spyk. L'inscunter dad ier dat perditga da las relaziuns excellentas tranter ils dus chantuns.
En il decurs dals discurs politics èn las duas regenzas sa barattadas davart numerus temas d'interess cuminaivel. Tranter auter han ellas signalisà lur interess communabel d'eventualmain midar l'utilisaziun d'ina anteriura pipeline d'ieli mineral. L'uschenumnà «conduct Oleodotto» tranter ils Pass dal Spleia (GR) e St.Margrethen (SG) pudess transportar en il futur idrogen ed electricitad. Ils dus chantuns coordineschan perquai tranter pèr ils ulteriurs scleriments per midar eventualmain l'utilisaziun dal conduct existent.
In ulteriur tema è stada la concessiun da reducziuns dal pretsch per purschidas extrachantunalas admessas da la tgira d'uffants cumplementara a la famiglia. En ils dus chantuns duain en il futur er famiglias che affidan lur uffants a la tgira dal chantun vischin, profitar da las reducziuns dal pretsch. Ultra da quai han las regenzas discutà, co che l'administraziun publica pudess utilisar l'intelligenza artifiziala.
Suenter il discurs da lavur è stada sin il program ina visita da la Biblioteca dal chapitel Son Gagl – cun inscripziun en il cudesch d'aur. Sco finiziun ha gì lieu ina tschaina cuminaivla da las duas delegaziuns.
Fotografia agiuntada:
©Chanzlia dal chantun Son Gagl
Infurmaziuns:
President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch
Responsabladad: Regenza