La bilantscha 2023 da las controllas uffizialas da las victualias e da l'aua da baiver, da duscha e da bogn en ils chantuns Grischun e Glaruna è positiva: Pli che 93 pertschient dals manaschis controllads han survegnì ina fitg buna u buna valitaziun da l'Uffizi per la segirezza da victualias e per la sanadad d'animals (USVA).
Victualias segiras da la stalla fin sin il plat, aua da baiver irreproschabla sco er animals sauns e ventiraivels che vegnan tegnids en moda confurma a la spezia stattan en il focus dal post da servetsch. Il labor modern en il Center administrativ Sinergia a Cuira è in instrument impurtant per ademplir questas incumbensas. En ses rapport annual guarda l'Uffizi per la segirezza da victualias e per la sanadad d'animals (USVA) enavos sin las activitads da l'onn 2023.
Predicat «fitg bun» u «bun» per la segirezza da las victualias
Il rapport annual infurmescha tranter auter davart la surveglianza uffiziala da las victualias, davart la controlla da l'aua da baiver, da duscha e da bogn sco er davart las inspecziuns tar ils manaschis che mettan en circulaziun chemicalias. 37 pertschient da las 5469 interpresas da victualias registradas, dals 642 provediments d'aua da baiver e manaschis da bogn e dals 222 manaschis che mettan en circulaziun chemicalias en ils chantuns Grischun e Glaruna èn vegnids controllads. Tut en tut survegnan ils manaschis in fitg bun attest. 93,3 pertschient dals manaschis controllads pon numnadamain vegnir attribuids a la classa da ristga «fitg bun» u «bun».
Ultra da las inspecziuns uffizialas vegn l'autocontrolla dals manaschis da victualias survegliada tras in vast spectrum da controllas da products en il labor. Ils labors analiseschan per exempel café brassà e latg conservà, dentant er la qualitad da l'aua da baiver en ils bigls dals vitgs u da las citads sco er la qualitad da l'aua da far bogn en ils bogns cuverts publics, en ils bogns da cuminanzas da proprietaris en condomini ed en ils bogns d'hotels.
Autas pretensiuns a la sanadad d'animals
Per examinar las prescripziuns areguard la sanadad d'animals, areguard il diever da medicaments veterinars, areguard il traffic d'animals ed areguard la protecziun dals animals ha il Servetsch veterinar visità e controllà 26 pertschient da las tratgas d'animals da niz registradas. Talas controllas vegnan fatgas per part er senza preannunzia. En 53 stabiliments da maz permess èn vegnids mazzads 23 541 animals da niz. Ils animals da maz e la charn èn vegnids controllads da veterinarias e veterinaris uffizials. Medemamain han quels er controllà 20 pertschient da la selvaschina sajettada. Tut en tut survegnan ils manaschis agriculs ed ils stabiliments da maz in bun attest.
Las controllas areguard la protecziun dals animals, che vegnan fatgas sin annunzia da la populaziun, na concernan betg mo tratgas agriculas d'animals da niz, mabain er tegnidas d'animals da niz per hobi e pli e pli er tegnidas d'animals da chasa e d'animals selvadis.
La societad ha grondas pretensiuns d'avair animals sauns. Questas pretensiuns cumpiglian er mesiras preventivas cunter l'import d'epidemias d'animals sco la grippa d'utschels nà dals pajais vischins. Il chantun Grischun cunfinescha directamain cun l'Italia e cun l'Austria e sto tegnair quint da questa circumstanza.
La versiun digitala dal rapport annual stat a disposiziun sin la pagina d'internet dal USVA ed infurmescha la populaziun cun cifras e fatgs davart tschertas campagnas da controlla.
Infurmaziuns:
Dr. Giochen Bearth, veterinari chantunal e manader da l'Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 10.00 fin las 12.00), e‑mail Giochen.Bearth@alt.gr.ch
Responsabladad: Uffizi per la segirezza da victualias e per la sanadad d'animals