Il Departament da giustia, segirezza e sanadad ha danovamain envidà il favrer 2024 tut sias collavuraturas e tut ses collavuraturs da s'exprimer davart lur situaziun da lavur. Ils resultats èn tut en tut positivs. Cunzunt mussan las respostas er ina gronda prontezza da s'engaschar da las collavuraturas e dals collavuraturs. Ils resultats detagliads vegnan uss analisads profundamain. Là, nua che quai è necessari sin fundament dals resultats, vegnan ils singuls uffizis ad instradar mesiras.
L'october 2021 ha il Departament da giustia, segirezza e sanadad (DGSS) realisà per l'emprima giada in'enquista sistematica davart la situaziun da lavur tar las var 1300 collavuraturas e collavuraturs. Ussa è l'enquista vegnida repetida. Sco spetgà èn in pau damain respostas vegnidas returnadas il 2024 che a chaschun da l'emprima enquista. Cun bunamain 73 pertschient è la procentuala da respostas dentant auta e fitg represchentativa. Omaduas enquistas èn vegnidas realisadas ed evaluadas en moda anonima da la firma independenta Empiricon che ha en quest sectur ina posiziun predominanta en Svizra.
Vinavant gronda cuntentientscha a la lavur e prontezza da s'engaschar
Sur tut ils temas – dal clima da lavur sur la direcziun fin al svilup dal persunal – sa mussa ina midada positiva da las valurs en cumparegliaziun cun l'onn 2021. Las valurs per la cuntentientscha a la lavur, per l'engaschament e per l'entusiassem per la lavur è restà sin in aut nivel en l'entir departament. Cun 72 da 100 puncts è la cuntentientscha a la lavur tut en tut auta ed ella è sa meglierada per 2 puncts en cumparegliaziun cun l'onn 2021. Medemamain per 2 puncts è l'engaschament s'augmentà, numnadamain da 79 sin 81 da 100 puncts. Restada sin il nivel fitg aut cun 81 da 100 puncts è la prontezza da s'engaschar cumplainamain a la lavur. «Igl è bel da vesair che nossas stentas per ina gronda cuntentientscha da las collavuraturas e dals collavuraturs vegnan percepidas en moda positiva e che quai sa mussa en l'enquista», constatescha il cusseglier guvernativ Peter Peyer cun plaschair.
Cleras meglieraziuns
Cumpareglià cun l'emprima enquista è la cuntentientscha cun la situaziun da lavur creschida cleramain tar las collavuraturas e tar ils collavuraturs da la Polizia chantunala e da l'Uffizi da migraziun e da dretg civil. Ils resultats da l'enquista reflecteschan las grondas stentas dals responsabels en ils uffizis correspundents d'augmentar la cuntentientscha a la lavur.
Er las manadras ed ils manaders dals uffizis èn vegnids valitads cleramain en moda pli positiva en cumparegliaziun cun l'enquista da l'onn 2021. Las collavuraturas ed ils collavuraturs avevan alura vesì potenzial da meglieraziun principalmain tar la chapientscha da decisiuns. Il basegn da pudair chapir decisiuns è restà, el vegn dentant valità cleramain en moda pli positiva. Ina clera meglieraziun è medemamain vegnida cuntanschida tar la communicaziun a temp da las midadas e tar il clima da lavur. «Quests resultats ans motiveschan da cuntinuar cun la via instradada», di il cusseglier guvernativ Peter Peyer. «Ina communicaziun interna bain chapibla sur tut ils plauns è ina pitga impurtanta per la cuntentientscha da las collavuraturas e dals collavuraturs.»
Svilup dal persunal e pussaivladad da cooperar identifitgads sco champs d'acziun
Las respostas mussan er che la concepziun dal svilup dal persunal è in punct essenzial, cun il qual la cuntentientscha a la lavur po anc vegnir meglierada. Las collavuraturas ed ils collavuraturs giavischan cunzunt dapli pussaivladads da contribuir a l'ulteriur svilup professiunal e da cunconcepir il mintgadi da lavur. Medemamain resta grond il giavisch da las collavuraturas e dals collavuraturs che la direcziun dals uffizis e dal departament sajan pli visiblas.
Analisas pli detagliadas ensemen cun las direcziuns dals uffizis
Ils proxims mais vegnan ils resultats analisads e giuditgads detagliadamain dal schef dal departament ensemen cun las direcziuns dals uffizis. Il departament ed ils uffizis sa refereschan latiers er a las recumandaziuns da la firma Empiricon. Sa basond sin questas recumandaziuns vegnan mintgamai definidas las mesiras necessarias per cuntanscher las adattaziuns giavischadas da las collavuraturas e dals collavuraturs. Temas surordinads sco il salari u pussaivladads da furmaziun supplementara vegnan analisads cun integrar l'Uffizi da persunal.
Occurrenzas da rait en las regiuns
Per augmentar vinavant la visibilitad e la perceptibilitad da la direcziun dal departament, èn quest onn planisadas occurrenzas da rait regiunalas a Cazas, Roveredo, Samedan, Glion, Tavau e Cuira. A chaschun da quests inscunters pon tut las collavuraturas ed ils collavuraturs dal Departament da giustia, segirezza e sanadad en las regiuns sa barattar tranter els e cun il schef dal departament.
Agiunta:
Fegl d'infurmaziun Empiricon
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, Tel. +41 81 257 25 01 (cuntanschibel da las 12.30 fin las 14.00), e‑mail Peter.Peyer@djsg.gr.ch
Responsabladad: Departament da giustia, segirezza e sanadad