La situaziun sin il martgà d'abitaziuns en il chantun Grischun mussa ina stgarsezza permanenta d'abitaziuns che na s'augmenta dentant betg ulteriuramain. Quai resulta da l'actualisaziun da l'analisa da las basas da l'onn 2023. L'actualisaziun era vegnida incumbensada dal Departament d'economia publica e fatgs socials (DES).
Per tegnair quint dals svilups e da las discussiuns en connex cun la stgarsezza e cun l'augment dals pretschs da las abitaziuns, propona la Regenza ina nova Lescha davart la promoziun d'abitaziuns en il chantun Grischun (LPA). La missiva correspundenta per mauns dal Cussegl grond è vegnida deliberada il mars 2025.
En vista al tractament da la missiva en la sessiun da zercladur 2025 sa tschenta la dumonda, co che la situaziun dal martgà è sa sviluppada dapi la publicaziun da l'analisa da las basas «Spazi d'abitar stgars en il chantun Grischun» dal december 2023.
Stabilisaziun da la stgarsezza d'abitaziuns
La stgarsezza d'abitaziuns è sa stabilisada en bleras regiuns dal chantun. L'analisa da las basas actualisada mussa dentant er, che la situaziun dal martgà e la perspectiva ston vegnir giuditgadas differentamain da regiun a regiun. Tut tenor la regiun è la purschida da spazi d'abitar che stat a disposiziun, memia pitschna per ils martgads da lavur e chaschuna augments dals pretschs tant per las abitaziuns da locaziun sco er per la proprietad d'abitar.
Ultra da l'augment da la dumonda è la pitschna activitad temporara da construir edifizis novs stada in motiv per la stgarsezza d'abitaziuns ch'è resultada durant ils ultims onns. Da giuditgar en moda positiva è il fatg, che tant l'activitad da construir sco er l'activitad da planisar novs edifizis han puspè survegnì schlantsch.
Missiva davart la promoziun d'abitaziuns
La nova Lescha davart la promoziun d'abitaziuns en il chantun Grischun, che la Regenza ha suttamess al Cussegl grond, cuntegna d'ina vart l'extensiun da l'instrument da promoziun existent per meglierar las relaziuns d'abitar en il territori da muntogna. Da l'autra vart duai vegnir stgaffì in nov instrument per sustegnair ils purtaders d'abitaziuns d'utilitad publica da construir abitaziuns da locaziun favuraivlas.
Agiunta:
Actualisaziun dal studi 2023: Analisa da las basas «Spazi d'abitar stgars en il chantun Grischun»
Infurmaziuns:
President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 11.00 fin las 12.00), e‑mail Marcus.Caduff@dvs.gr.ch
Responsabladad: Departament d'economia publica e fatgs socials