Il chantun Grischun metta in accent per cundiziuns favuraivlas a las famiglias: A partir dal 1. d'avust 2025 survegnan las famiglias dapli sustegn per la tgira d'uffants. A partir da questa data metta la Regenza en vigur la revisiun totala da la Lescha davart la promoziun da la tgira d'uffants cumplementara a la famiglia en il chantun Grischun (LTGU). Ina midada da sistem tar la finanziaziun garantescha il tractament egual da las famiglias en l'entir chantun. In calculatur online procura per transparenza davart las reducziuns.

La Regenza metta en vigur per il 1. d'avust 2025 la revisiun totala, deliberada dal Cussegl grond, da la Lescha davart la promoziun da la tgira d'uffants cumplementara a la famiglia en il chantun Grischun (LTGU; DG 548.300). A medem temp approvescha ella la revisiun totala da l'Ordinaziun davart la promoziun da la tgira d'uffants cumplementara a la famiglia en il chantun Grischun (OTGU; DG 548.310). Uschia pon las novas regulaziuns e la nova finanziaziun da la tgira d'uffants cumplementara a la famiglia vegnir realisadas a partir dal 1. d'avust 2025.

Rinforzar la cumpatibilitad da la professiun cun la famiglia
La nova lescha meglierescha la cumpatibilitad da la professiun cun la famiglia e sustegna il svilup dals uffants. Il nov model da finanziaziun garantescha, che las famiglias en l'entir chantun vegnian tractadas en moda eguala e che tut las ulteriuras furnituras da prestaziuns (canortas d'uffants, canortas d'uffants pitschens e famiglias dal di) hajan las medemas cundiziuns da partenza. Ina purschida bain sviluppada e d'auta qualitad da la tgira d'uffants cumplementara a la famiglia è ina pitga impurtanta per la cumpatibilitad da la professiun cun la famiglia e fa frunt a la mancanza da persunas spezialisadas.

Reducziuns tenor las entradas
Cun la midada da sistem da l'uschenumnada finanziaziun da l'object a la promoziun sin basa da la finanziaziun dal subject vegnan las famiglias en il chantun Grischun sustegnidas pli fitg. Da nov survegnan ellas reducziuns dals custs pli autas per la tgira d'uffants cumplementara a la famiglia.

Las reducziuns dals custs sa drizzan tenor l'autezza da las entradas da las famiglias. La reducziun maximala vegn pajada en cas d'entradas decisivas pli bassas che 40 000 francs ed importa 90 pertschient dals custs normads. La reducziun minimala importa 25 pertschient dals custs normads. Ella vegn pajada, sche las entradas decisivas da la chasada importan 130 000 francs u dapli. Las entradas decisivas vegnan calculadas tenor la medema metoda sco per la reducziun individuala da las premias (RIP).

Calculatur online e nova applicaziun web «quint»
Ils geniturs pon vegnir a savair lur dretg individual da survegnir reducziuns dals custs per la tgira d'uffants sur in calculatur online. Il calculatur stat a disposiziun sut quest link: https://quint.gr.ch/calculator

Per la midada da sistem survegnan las furnituras da prestaziuns (canortas d'uffants, canortas d'uffants pitschens e famiglias dal di) ina nova applicaziun web per las annunzias e per ils rendaquints. Ellas vegnan scoladas il matg 2025 davart la midada da sistem e davart la nova applicaziun «quint».

Custs normads e tariffas maximalas
La Regenza ha plinavant fixà da nov l'autezza dals custs normads. Els valan a partir dal 1. d'avust 2025. Ils custs normads èn valurs medias dals custs da las purschidas da la tgira d'uffants cumplementara a la famiglia ed els furman la basa per calcular las reducziuns. Ils novs custs normads importan:

• uffants a partir da 18 mais fin l'entrada en la scola primara: 10.60 francs per ura da tgira
  
• uffants da 3 fin 18 mais: 15.90 francs per ura da tgira
• uffants a partir da l'entrada fin a la fin da la scola primara: 5.30 francs per ura da tgira

Per evitar svilups extrems dals pretschs tar las purschidas da tgira èn vegnidas fixadas tariffas maximalas che ston vegnir resguardadas. Ellas importan 150 pertschient dals custs normads.

Infurmaziuns:

• President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 13.00 fin las 14.00), e‑mail Marcus.Caduff@dvs.gr.ch
• Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 09.00 fin las 10.00), e‑mail Susanna.Gadient@soa.gr.ch
• Team Reducziun dals custs Tgira d'uffants cumplementara a la famiglia, glindesdi fin venderdi 08.00 fin 12.00 e 13.30 fin 17.00, tel +41 81 257 53 96. Gugent dastgais Vus ans scriver in e-mail ordaifer il temp da preschientscha a quint@soa.gr.ch

Responsabladad: Regenza