Il chantun Grischun metta er l'onn 2025 in cler signal cunter la violenza a chasa. A chaschun dals dis d'acziun dals 25 da november fin ils 10 da december 2025 vegn la publicitad sensibilisada davart il tema e rendida attenta a las purschidas d'agid. Il focus da quest onn è la violenza cunter persunas cun impediments. Il chantun appellescha la populaziun, organisaziuns ed instituziuns da participar e sustegna finanzialmain occurrenzas u acziuns.

Violenza a chasa n'enconuscha nagins cunfins geografics, culturals u socials. Ella exista en differentas furmas – corporala, sexuala, psichica ed economica – e pertutga persunas entaifer la famiglia u exista tranter partenarias e partenaris (anteriurs). Er la violenza en furmas d'abitar assistidas sco instituziuns da tgira u gruppas d'abitar fa part da la violenza a chasa, cun quai che las persunas pertutgadas vivan en in ambient social dependent e savens stretg. Violenza a chasa n'è betg ina chaussa privata – ella è chastiabla e na vegn betg tolerada en nossa societad.

Ristga pli gronda per persunas cun impediments
Tenor l'Uffizi federal da statistica vivan en Svizra tut en tut circa 1,9 milliuns persunas cun impediments. Ellas han ina ristga pli gronda da daventar victimas da violenza. Quai è cunzunt lura il cas, sch'ellas dovran sustegn en il mintgadi u sche lur abilitads da communitgar e da proteger sasezzas èn reducidas. Periclitadas èn spezialmain dunnas e mattas cun impediments.

Sensibilisar, gidar, agir
Bleras victimas taschan per tema u per vargugna. Er tgi che suppona u observa violenza a chasa sa senta bleras giadas pers. Ils Dis d'acziun porschan ina plattafurma per sensibilisar e per discutar avertamain. En il chantun Grischun datti numerusas purschidas d'agid per persunas pertutgadas e per confamigliars. Questas purschidas duain vegnir rendidas enconuschentas. Ulteriuras infurmaziuns èn disponiblas sin www.violenza-a-chasa.gr.ch e sin www.findhelp.gr.ch.

Il chantun coordinescha e sustegna finanzialmain
Ils Dis d'acziun cunter violenza a chasa vegnan accordads cun la campagna «16 dis cunter violenza envers dunnas» e cun ils «Orange Days». En il Grischun è il Post da coordinaziun Violenza a chasa responsabel per l'organisaziun. Il chantun sustegna finanzialmain las occurrenzas ed acziuns davart il tema violenza a chasa sco er spezialmain davart il tema central «violenza cunter persunas cun impediments». Ultra da quai fa el attent a las occurrenzas e metta a disposiziun material da campagna als organisaturs.

Persunas ed organisaziuns interessadas pon inoltrar lur annunzias e dumondas fin ils 13 d'avust 2025. Ils formulars pon vegnir chargiads giu da la pagina d'internet dal Post da coordinaziun Violenza a chasa.

Occurrenzas da rait e d'infurmaziun
Il Post da coordinaziun Violenza a chasa ed il Post da coordinaziun per l'egualitad e per ils dretgs da las persunas cun impediments envidan mesemna, ils 21 da matg 2025 da las 16.30 fin las 18.30 ad in'occurrenza da rait e d'infurmaziun en la ibW Scola spezialisada superiura da la Svizra Sidorientala a Cuira.

Posts spezialisads ed organisaziuns infurmeschan en referats curts davart la violenza a chasa, las purschidas d'agid ed ils dis d'acziun 2025. L'occurrenza sa drizza a persunas spezialisadas da differents secturs sco er a la vasta publicitad. In apero a la fin da l'occurrenza porscha l'occasiun da sa barattar e da crear raits. Persunas ed organisaziuns interessadas pon s'annunziar per e-mail u per telefon fin ils 15 da matg 2025: Madlaina.Baselgia@soa.gr.ch / +41 81 257 26 11. Sche Vus duvrais in sustegn supplementar al lieu, ans communitgai quai per plaschair tar l'annunzia (p.ex. interpret(a) da lingua da segns).

Fotografia agiuntada:

Infurmaziuns:

Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Madlaina.Baselgia@soa.gr.ch

Responsabladad: Uffizi dal servetsch social

Resumà en lingua facila

Violenza a chasa cunter persunas cun impediments
Violenza a chasa è in dachasa violent.
Quai po capitar en mintga dachasa.
Las persunas cun impediments subeschan dapli violenza a chasa che autras persunas.

Nossa societad na tolerescha nagina violenza.
Ins po clamar la polizia.
Violenza po vegnir chastiada.

Has ti gia experimentà violenza?
Vuls ti discurrer cun insatgi da quai?
Ti chattas agid sin www.violenza-a-chasa.gr.ch u www.findhelp.gr.ch.

Emprim inscunter en matg davart il tema violenza
I dat in inscunter davart il tema violenza.
Cura?
Ils 21 da matg 2025 da las 16.30 fin las 18.30.
Nua?
En la ibW Scola spezialisada superiura da la Svizra Sidorientala.
Il chantun organisescha quai.
Persunas spezialisadas ed organisaziuns èn da la partida.
Là datti referats e discussiuns.
Er ti pos vegnir e tadlar e ta participar a la discussiun.

T'annunzia per e-mail u per telefon.
Il e-mail è: madlaina.baselgia@soa.gr.ch
Il numer da telefon è: 081 257 26 11.

Has ti basegn d'agid per l'inscunter?
Communitgescha quai tar l'annunzia.
Has ti dumondas davart l'inscunter?
Communitgescha quai tar l'annunzia.
T'annunzia fin ils 15 da matg 2025.

Dis d'acziun il november ed il december
Violenza a chasa cunter persunas cun impediments è adina in tema.
I dat dis d'acziun davart il tema.
Cura?
Dals 25 da november fin ils 10 da december 2025.
Nua?
En l'entir Grischun.

Organisaziuns e persunas pon far in'acziun cunter violenza.
In'acziun è in'occurrenza.
Il chantun infurmescha tuts davart questas occurrenzas.

Has ti ina idea per in'occurrenza?
Ans scriva tia idea fin ils 13 d'avust 2025.
Ans scriva qua: https://www.gr.ch/RM/instituziuns/administraziun/dvs/soa/violenza/dis-dacziun/Seiten/default.aspx
Il chantun ta gida cun material e cun daners.