Violenza a chasa n'enconuscha nagins cunfins geografics, culturals u socials. Ella vegn avant en differentas furmas – corporala, sexuala, psichica ed economica – e pertutga persunas entaifer la famiglia u exista tranter partenaris (anteriurs). Er la violenza en furmas d'abitar assistidas sco instituziuns da tgira u gruppas d'abitar fa part da la violenza a chasa, cun quai che las persunas pertutgadas vivan en in ambient social dependent e savens stretg. Violenza a chasa n'è betg ina chaussa privata – ella è chastiabla e na vegn betg tolerada en nossa societad.
En il rom dals dis d'acziun mettan numerusas organisaziuns ed instituziuns en l'entir chantun in signal cunter violenza a chasa. Il program multifar cun tut las acziuns ed occurrenzas chattais Vus qua: Il program dals dis d’acziun 2025.
Ristga pli gronda per persunas cun impediments
Quest onn metta il Grischun in focus spezial sin la violenza cunter persunas cun impediments. Perquai ch'ellas han ina ristga pli gronda da daventar victimas da violenza. Quai è cunzunt lura il cas, sch'ellas dovran sustegn en il mintgadi u sche lur abilitads da communitgar e da proteger sasezzas èn reducidas. Periclitadas èn spezialmain dunnas e mattas cun impediments.
Agid e sustegn disponibel
Bleras victimas taschan per tema u per vargugna. Er ils confamigliars e l'ambient social na san savens betg, co ch'els duain reagir. En il chantun Grischun datti bleras purschidas d'agid per persunas pertutgadas e per confamigliars. Questas purschidas duain vegnir rendidas enconuschentas durant ils dis d'acziun. Ina survista chattais Vus sut Cussegliaziun e protecziun per persunas ch'èn pertutgadas da violenza.
Exposiziun ambulanta 2025
Dapli infurmaziuns latiers chattais Vus sut Wanderausstellung - Aktionstage.
En lingua facila
Violenza a chasa envers persunas cun impediments
Violenza a chasa è violenza en l'agen dachasa.
Quai po capitar en mintga dachasa.
Envers persunas cun impediments datti pli savens violenza a chasa, che envers autras persunas.
Tge è violenza?
- sch'insatgi fa mal a Voss corp
- sch'insatgi di pleds nauschs a Vus
- sch'insatgi sforza Vus da far acts sexuals
Nossa societad na tolerescha nagina violenza.
Ins po clamar la polizia.
Violenza po vegnir chastiada.
Qua chattais Vus agid (cliccar).
Dis d'acziun il november ed il december
Violenza a chasa envers persunas cun impediments è adina in tema.
I dat dis d'acziun davart quest tema.
Dals 25 da november fin ils 10 da december 2025 en l'entir Grischun.
Organisaziuns e persunas fan in'acziun cunter violenza.
In'acziun è in'occurrenza.
In'acziun duai dar en egl.
Bleras occurrenzas èn planisadas:
- Martgà da Nadal
- Satuar
- Film da kino
- Discussiun davart la violenza en chasas da dimora
Autras acziuns:
- chasas glischan en colur oranscha
- sin il stgarnuz da paun stat insatge cunter violenza
I dat anc dapli acziuns.
Vulais Vus guardar tuttas?
Alura cliccai qua.
Avais Vus dumondas?
As annunziai per e-mail u per telefon.
Il e-mail è haeusliche.gewalt@soa.gr.ch
Il numer da telefon è: 081 257 26 11.
Ulteriuras informaziuns
Ulteriuras infurmaziuns davart ils dis d'acziun cunter violenza a chasa chattais Vus en il fegl d'infurmaziun. Per dumondas stat a disposiziun il Post da coordinaziun Violenza a chasa.
Echo da medias
2024
- RTR, 25-11-2024 (03:50): «Vias or da la violenza»
- Südostschweiz, 25-11-2024: Graubünden in Orange: Eine Kampagne gegen häusliche Gewalt
- Südostschweiz, 22-11-2024 (02:45): Häusliche Gewalt: Immer mehr Menschen getrauen sich, Hilfe zu holen
- SRF 1, 27-11-2024 (07:37): Madlaina Baselgia, Leterin Koordinationsstelle Häusliche Gewalt, Der Kanton Graubünden sucht nach neuen Wegen aus der Gewalt in der Partnerschaft
- Südostschweiz, 14-12-2024: «Zwei Frauen setzen ein Zeichen gegen häusliche Gewalt»
- Südostschweiz, 15-12-2024: «Wo Gewaltverletzungen korrekt dokumentiert werden»
- RTR, 17-12-2024 (6:00): «Chantar per la pasch»
2023
La campagna cunter violenza a chasa 2025
La campagna cunter la violenza a chasa, ch‘è vegnida lantschada dal chantun Grischun, sensibilisescha en pliras linguas cun slogans sco «La violenza n'è betg privata.» u «Intervegnir curaschusamain.». La finamira è quella d‘encuraschar persunas pertutgadas da violenza e persunas violentas sco er lur ambient social da tschertgar agid e sustegn. La realisaziun da la campagna è vegnida fatga da la producziun da films «schau.».
«Toxic Love»
l Grischun ha plinavant inizià la campagna da sensibilisaziun interchantunala «Toxic Love» che ha la finamira d'identifitgar a temp la violenza a chasa. A persunas pertutgadas ed a persunas participadas, dentant er a terzas persunas betg participadas duai vegnir gidà a percorscher ils signals d'avertiment e da dumandar agid a temp.
Website «Toxic Love»
Dis d'acziun sin l'entir mund
Dals 25 da november, il Di internaziunal cunter la violenza envers dunnas, fin ils 10 da december, il Di dals dretgs umans, mettan differentas organisaziuns sin l'entir mund in signal per ina societad senza violenza. L'illuminaziun oranscha d'edifizis, ch'è visibla durant quests dis sin l'entir mund, è in signal simbolic cunter violenza.
En il Grischun han lieu mintga onn «Dis d'acziun cunter violenza a chasa». Il chantun coordinescha e sustegna las occurrenzas e las acziuns regiunalas che mettan en il focus mintga onn ina furma da la violenza a chasa.
Ils «Dis d'acziun cunter violenza a chasa en il Grischun» èn inspirads da las iniziativas dals dus moviments internaziunals «Orange Days» e «16 dis cunter violenza envers dunnas». Il chantun coordinescha e sustegna occurrenzas ed acziuns en las regiuns.