Dals 25 da november fin ils 10 da december 2022 han lieu en il Grischun ils dis d'acziun annuals cunter violenza a chasa. Il tema central da quest onn è «femicidi». Planisadas èn numerusas occurrenzas ed acziuns variadas en l'entir chantun.
Mintga segunda emna capita in femicidi en Svizra, quai vul dir ch'ina dunna vegn mazzada da ses partenari u da ses um. Cun ils dis d'acziun da quest onn vul il chantun Grischun ensemen cun differentas organisaziuns far attent al tema «femicidi», ma er als cumenzaments da la violenza a chasa. Savens cumenza quella numnadamain en moda innocenta e senza ch'insatgi la bada. Il quità – «Tge fas ti, nua es ti?» – sa mida en controlla, il skerz – «Mia quaclina!» – sa mida en umiliaziun e l'armonia – «Il pli gugent fiss jau mo ensemen cun tai!» – sa mida en isolaziun. Perquai èsi impurtant da guardar d'emprim ennà.
Violenza a chasa na vegn betg en il stgarnuz
En l'entir chantun Grischun han lieu las pli differentas occurrenzas – da l'acziun da stans cun punsch d'oranschas sur l'illuminaziun d'edifizis fin a l'installaziun sin la plazza dal teater a Cuira. L'acziun originala «Häusliche Gewalt kommt bei uns nicht in die Tüte», nua che las pasternarias vendan lur paun en stgarnuzs spezials, ha quest onn lieu a Tavau, en il Partenz, en l'Engiadin'Ota ed Engiadina Bassa, en las valladas dal sid sco er a Cuira. Tar las organisaturas da las occurrenzas ed acziuns tutgan tranter auter il Club Soroptimist, il Club Zonta, l'Associaziun svizra da las academicras, la Chasa da dunnas sco er il Collectiv da la chauma da dunnas dal Grischun.
Eco da medias
Flyer
Flyer Program Dis d'acziun cunter violenza a chasa 2022
Program Dis d'acziun cunter violenza a chasa 2022
tgi |
tge |
nua |
cura |
Club Soroptimist Cuira
Club Zonta Cuira
Associaziun svizra da las academicras
|
Häusliche Gewalt kommt bei uns nicht in die Tüte
Acziun cun stgarnuzs da paun: tschertas pasternarias da Cuira vendan lur pauns en stgarnuzs da paun spezials cun l'inscripziun «Häusliche Gewalt kommt bei uns nicht in die Tüte».
|
Cuira, pasternarias |
25.11.-10.12.22 |
Club Zonta Cuira
|
In pèr chalzers per mintga dunna*
Mintga duas emnas perda ina dunna* sia vita pervia da ses um u partenari en Svizra. Per mintga dunna* pertutgada giaschan in pèr chalzers oranschs davant il Teater Cuira. Uschia daventan las dunnas* pertutgadas visiblas per tuts.
|
Cuira, Theaterplatz |
25.11.-10.12.22 |
Club Soroptimist Tavau Partenz
Club Soroptimist Engiadin'Ota
Club Zonta Engiadina
|
Häusliche Gewalt kommt bei uns nicht in die Tüte
Acziun cun stgarnuzs da paun: differentas pasternarias da Tavau e dal Partenz sco er en l'Engiadin'Ota, en l'Engiadina Bassa ed en las vals dal sid vendan lur pauns en stgarnuzs da paun spezials cun l'inscripziun «Häusliche Gewalt kommt bei uns nicht in die Tüte».
|
Tavau-Partenz, Engiadin'Ota ed Engiadina Bassa, vals dal sid, pasternarias |
25.11.-10.12.22 |
Chasa da dunnas dal Grischun |
La violenza a chasa ha bleras fatschas
Quatter spots da video mussan en moda impressiunanta che violenza a chasa po pertutgar mintga dunna.
|
Grischun, spots da video en meds da transport publics, tancadis, uffizis postals |
25.11.-10.12.22 |
Club Soroptimist Cuira
Club Zonta Cuira
Associaziun svizra da las academicras
|
Stan d'acziun
Infurmaziuns davart il tema violenza envers dunnas e violenza a chasa
|
Cuira, Untere Bahnhofstrasse |
25.11.22
10.00-19.00 |
Club Soroptimist Cuira
Club Zonta Cuira
Associaziun svizra da las academicras
|
Cuira traglischa en oransch
Cunter la violenza envers dunnas e cunter la violenza a chasa traglischan en oransch: la staziun d'autos da posta, la Biblioteca da la citad, il Museum d'art dal Grischun, il curtin da la Villa Planta, il Teater Cuira, la Banca Chantunala Grischuna, il Museum retic, la Biblioteca chantunala, la Chasa grischa, il Center administrativ sinergia, la chasa da scola Quader, la libraria Schuler, la Scola auta da pedagogia dal Grischun
|
Cuira, differents lieus |
25.11.22
a partir da las 17.00 |
Collectiv da la chauma da dunnas* dal Grischun |
Tavulin feministic davart il tema Femicidi / violenza envers dunnas*
Il tavulin feministic sa scuntra mintga emprima gievgia dal mais per sa barattar davart temas feministics. El tematisescha il femicidi e la violenza envers dunnas*, quai cun in input da Bettina Melchior, manadra da l'Agid a victimas dal Grischun ed anteriura manadra da la Chasa da dunnas dal Grischun.
|
Cuira, Werkstatt |
01.12.22
19.00 |
Club Soroptimist Tavau Partenz |
Stan d'acziun cun punsch d'oranschas
Infurmaziuns davart ils dis d'acziun cunter violenza a chasa e davart ils Orange Days mundials cunter violenza envers dunnas
|
Tavau Plaz, Arkadenplatz |
28.11.22
17.00-19.00 |
Sara Adzayi-Nussio
Karin Rüegsegger
|
Terra, colur, forza da dunnas
Mai pli violenza a chasa! La gritta pon ins transfurmar en energia creativa. Cun colurs e tuns exprimin nus la gritta. En in ambient plaschaivel creescha mintga dunna ord questa forza in maletg u in object persunal. Enconuschientschas preliminaras n'èn betg necessarias.
|
Cuira, Atelier da pictura e lavuratori da cheramica, Steinbruchstrasse 16 |
29.11. / 6.12.22
19.00-21.00 |
Femicidi – tge è quai?
En Svizra capita mintga duas emnas in femicidi – q.v.d. mintga duas emnas vegn ina dunna mazzada da ses partenari u expartenari.
La noziun «femicidi» designescha il mazzament da dunnas e da mattas sin fundament da lur schlattaina. Il femicidi cumpiglia uschenumnads murdraretschs d'onur sco er mazzaments da dunnas e da mattas en conflicts da guerra, en connex cun il commerzi cun dunnas e mattas u en il sectur da la violenza en il partenadi. In tratg cuminaivel han tut ils femicidis: La dunna vegn mazzada, perquai ch'ella è ina dunna.