La Regenza ha concludì in'adattaziun dal Plan directiv chantunal en il sectur dal traffic en connex cun il project per diminuir il traffic a Sta. Maria. Ultra da quai ha ella approvà l'adattaziun respectiva dal Plan directiv regiunal Traffic sin via, ch'è vegnida concludida da la regiun Engiadina Bassa / Val Müstair ils 4 d'avrigl 2025.

Il center istoric da Sta.Maria è stretg. Sin in traject da circa 300 meters è el transibel praticamaind b sin in vial. Tras il vitg circulescha tut il traffic da transit da la via dal pass dal Fuorn – la stad e l'atun er anc il traffta. Ml pass da l'Umbrail. Il traffic crescha dapi onns e chaschuna en spezial durant ils mais da stad regularmain impediments e stagnaziuns. Per pudair diminuir en l'avegnir il traffic a Sta. Maria sto il project correspundent esser determinà en il Plan directiv chantunal e regiunal. Quai premetta in'adattaziun da la planisaziun directiva. Per avair ina basa respectiva han ins fatg dapi l'onn 2020 ina vasta evaluaziun da variantas per diminuir il traffic a Sta. Maria. Per quest intent èn vegnidas involvidas persunas spezialisadas da differents secturs.

L'adattaziun dal Plan directiv cumpiglia la determinaziun dal concept da diminuziun dal traffic «Nord bass», ch'è vegnì giuditgà sco meglra varianta. Quest concept prevesa la construcziun d'in sviament a l'ur nord da l'abitadi da Sta. Maria, che sutpassa il quartier Paclera sco er l'aual Muranzina tras in tunnel da var 600 meters lunghezza. Igl è indispensabel da determinar il project en il Plan directiv chantunal e regiunal. Mo uschia èsi pussaivel da segirar il corridor necessari en la planisaziun territoriala e d'al coordinar cun ulteriurs projects che han in effect sin il territori, sco er cun ils interess da la Confederaziun e dal chantun.

A l'Ovra electrica Fideris SA (en fundaziun) ha la Regenza dà la concessiun per il project «Implant electric Fideris». L'Ovra electrica Fideris SA ha l'intenziun da construir e da manar l'implant electric Fideris. Per quest intent duai la forza idraulica dal Bergbach sin il territori da la vischnanca da Fideris vegnir duvrada per producir energia electrica.

Igl è previs da tschiffar il Bergbach a Laflina sin bundant 1776 ms.m. Tras in conduct da pressiun arriva l'aua da Laflina a la centrala Strahlegg sin circa 877 ms.m. Là vegn l'aua turbinada. La prestaziun installada duai importar circa 4,5 megawatts, quai tar ina producziun annuala media da circa 13,1 uras gigawatt. Uschia duain circa 3300 chasadas vegnir furnidas cun electricitad. La concessiun vegn dada per ina durada da 60 onns a partir dal mument che l'ovra vegn messa en funcziun en moda ordinaria.

Ils 22 da schaner 2016 aveva la radunanza communala da Fideris concedì unanimamain il dretg da las auas necessari per il project da l'Ovra electrica Fideris SA. Suenter è il project vegnì sviluppà vinavant en in process participativ. Uschia è resultada ina planisaziun da protecziun e d'utilisaziun che prevesa d'utilisar pli fitg il Bergbach, che ha gia rempars, e da renunziar a l'utilisaziun dal Malanserbach, ch'è anc intact. Pervia da quai ha stuì vegnir adattada la concessiun existenta dal dretg da las auas. La radunanza communala da Fideris dals 12 da zercladur 2019 ha approvà questas midadas. La nova soluziun da la planisaziun da protecziun e d'utilisaziun è equilibrada areguard l'ecologia da las auas. Suenter ch'il Cussegl federal ha acceptà tala, ha la Regenza ussa approvà la concessiun dal dretg da las auas dal 2016 inclusiv supplement dal 2019

A las Ovras electricas d'Engiadina SA (OEE) ha la Regenza dà la permissiun per in'unica derschentada dal lai da gulivaziun Ova Spin. La derschentada dastga vegnir fatga la stad 2025 (matg fin fanadur). Sche la derschentada n'è betg pussaivla l'onn 2025, dastga ella vegnir spustada per maximalmain 2 onns.

La derschentada è previsa per motivs da la segirezza da manaschi dal lai da gulivaziun Ova Spin. L'ultima derschentada reussida è vegnida fatga l'onn 2009. Pervia da la contaminaziun cun PCB en la part sura dal Spöl è la derschentada limitada sin la part davant dal lai da gulivaziun.