La Regenza ha prendì posiziun davart pretensiuns da la Sessiun dals giuvenils 2024 e repartì contribuziuns or da las taxas da patenta d'alcohol ed or da la dieschma d'alcohol.
Posiziun davart pretensiuns da la Sessiun dals giuvenils
La Regenza grischuna è s'occupada da la Sessiun
dals giuvenils dal Grischun 2024. L'avrigl da l'onn passà èn sa fatschentads
circa 30 giuvenils durant 2 dis activamain cun l'avegnir dal chantun. Suenter
debattas intensivas ha il plenum la finala deliberà nov pretensiuns en furma
dad otg petiziuns sco er in statement. Questas propostas èn vegnidas surdadas
la fin da favrer 2025 via la Chanzlia chantunala a la Regenza. Ils giuvenils
han tractà ils secturs tematics «ambient, segirezza e spazi d'abitar», «sanadad
e fatgs socials» sco er «promoziun da la giuventetgna». En il rom d'ina
communicaziun al comité d'organisaziun da la Sessiun dals giuvenils ha la
Regenza prendì posiziun davart il cuntegn da tut las propostas dals giuvenils.
Posiziun
© Jugendsession-GR.ch
La Regenza grischuna è s'occupada da la Sessiun dals giuvenils dal Grischun 2024.
Contribuziun or da las taxas da patenta d'alcohol ed or da la dieschma d'alcohol
Differentas organisaziuns, instituziuns, uniuns,
federaziuns e fundaziuns d'utilitad publica survegnan quest onn ina
contribuziun da totalmain 357 000 francs or dal retgav da las taxas da
patenta d'alcohol. Tenor la Lescha d'ustaria
vegn in terz dal retgav net dal chantun or da la taglia dal commerzi en detagl
cun bavrondas destilladas duvrà per intents d'utilitad publica e dus terzs van
a favur da la promoziun dal turissem.
Ultra da quai vegnan pajads ora en il chantun
Grischun tut en tut 716 503 francs or da la dieschma d'alcohol da la
Confederaziun. Ils meds finanzials vegnan duvrads per mesiras d'infurmaziun che
duain gidar a prevegnir a problems d'alcohol sco er a l'abus da drogas, da
narcotics e da medicaments. Plinavant vegnan ils meds finanzials impundids per
mesiras che servan ad assister uffants e giuvenils da famiglias cun problems da
dependenza sco er per programs che sa drizzan a gruppas da ristga. Ultra da
quai vegnan cofinanziads posts da cussegliaziun spezialisads sco er
instituziuns d'assistenza e da tractament ambulant per persunas dependentas
d'alcohol, da tissis enivrants, da medicaments e da drogas. Tenor la Lescha
d'alcohol survegnan ils chantuns 10 pertschient dal retgav net da
l'Administraziun federala d'alcohol (dieschma d'alcohol).
Differentas organisaziuns, instituziuns, uniuns, federaziuns e fundaziuns d'utilitad publica survegnan quest onn ina contribuziun da totalmain 357 000 francs or dal retgav da las taxas da patenta d'alcohol.
