Per incumbensa da las proprietarias e dals proprietaris da guaud han ils manaschis forestals cultivà l'onn passà var 3900 hectaras guaud. Tut en tut èn quai stads 10 pertschient dapli che l'onn avant. La quantitad da laina racoltada è percunter sa reducida levamain. La Regenza ha approvà il project collectiv Selvicultura 2025 per danovamain promover ils guauds da protecziun e la biodiversitad.
L'onn 2024 èn vegnidas tgiradas totalmain 3896 hectaras guaud en il Grischun. Cumpareglià cun l'onn precedent correspunda quai ad in augment da 10 pertschient. Cun 380 000 meters cubic è la quantitad da laina racoltada stada in pau pli pitschna che l'onn avant (390 000 m³). Tenor il tagl chantunal annual pon vegnir utilisads en media 390 000 meters cubic laina per onn.
La quantitad da laina ch'ins ha stuì racoltar per prevegnir e per reparar donns da guaud è – sco gia l'onn avant – s'augmentada: Ella è creschida per 49 pertschient sin 114 000 meters cubic. Quai correspunda circa a 30 pertschient da tut la laina racoltada. Ils donns èn resultads principalmain pervia da precipitaziuns da naiv bletscha durant l'enviern 2023/2024 e pervia da divers stemprads pli pitschens durant la stad. Ils donns tras il bau-scorsa èn però restads sin in nivel extraordinariamain bass, quai grazia a l'aura umida ed a la rumida svelta.
Mesiras a favur dal guaud da protecziun ed adattaziun a la midada dal clima
La Confederaziun ed il chantun han pajà l'onn 2024 contribuziuns da 13,31 milliuns francs a las proprietarias ed als proprietaris da guaud per cultivar ils guauds da protecziun sin ina surfatscha da var 2000 hectaras. A medem temp èn vegnidas pajadas contribuziuns da 10,07 milliuns francs per reparar ils donns relativamain gronds ch'ins ha registrà. Cun promover la regiuvinaziun e la stabilitad dals guauds e cun evitar uschè bain sco pussaivel donns consecutivs duai vegnir segirada en moda persistenta la protecziun cunter privels da la natira. Ina rolla centrala en quest connex ha la Strategia spazi da viver guaud-selvaschina, che definescha las directivas surordinadas per ir enturn cun ils conflicts tranter il guaud e la selvaschina.
Ulteriurs programs en il guaud, che vegnan sustegnids cun meds finanzials federals e chantunals, cuntegnan mesiras per promover e per mantegnair la biodiversitad forestala, per cultivar cun la crana a cabel ils guauds strusch accessibels ordaifer il guaud da protecziun sco er per tgirar il guaud giuven ordaifer il guaud da protecziun. Per mantegnair la diversitad biologica èn vegnidas tgiradas var 320 hectaras guaud.
La surfatscha che serva a la tgira dal guaud giuven ordaifer il guaud da protecziun è creschida levamain l'onn 2024 ed importa ussa 150 hectaras. Ella procura per la stabilitad futura dals guauds e per l'adattaziun da la cumposiziun da las spezias da bostgs en vista a la midada cuntinuanta dal clima. La surfatscha ordaifer il guaud da protecziun ch'è vegnida rendida accessibla e racoltada cun la crana a cabel, è percunter sa reducida fermamain sin 135 hectaras. En divers programs è la surfatscha cultivada sa reducida. Ils motivs principals per quai èn ils blers donns dal guaud. Las resursas dals manaschis forestals publics e da las interpresas forestalas en il chantun èn stadas occupadas fermamain, entant che la quantitad da laina racoltada è restada sin in nivel sumegliant a quel da l'onn avant.
Approvaziun dal project collectiv Selvicultura 2025
En collavuraziun cun circa 200 proprietarias e proprietaris da guauds publics e privats èn puspè vegnids elavurads tschintg programs regiunals per l'onn current. Quests programs cuntegnan ils secturs guaud da protecziun, biodiversitad forestala e cultivaziun dal guaud ordaifer il guaud da protecziun. Il project collectiv Selvicultura 2025 cumpiglia la tgira da var 3200 hectaras guaud. La tgira dal guaud da protecziun ch'è planisada sin 2300 hectaras furma la part principala. Uschia duain las infrastructuras, ils abitadis e las vias vegnir protegidas duraivlamain ed effectivamain cunter privels da la natira. Sin passa 500 hectaras duain vegnir revalitads tranter auter spazis da viver da la giaglina da taus, guauds da pasculaziun, chaglioms spezials, urs da guauds e guaudets da chastagners al sid da las Alps, quai cun l'intent da promover la biodiversitad. Sin var 350 hectaras ordaifer ils guauds da protecziun èsi previs da cultivar il guaud giuven, da tgirar la stabilitad dal guaud sco er da far intervenziuns cun la crana a cabel per racoltar laina e per instradar parallelamain la regiuvinaziun dal guaud. Cun questas intervenziuns sa megliereschan las relaziuns da glisch. Quai ha ina influenza positiva sin il spazi da viver da las spezias d'animals e da plantas indigenas. La Regenza ha approvà quest project collectiv cun custs totals da 31 milliuns francs. Plinavant ha ella garantì a las proprietarias ed als proprietaris dals guauds participads contribuziuns federalas e chantunalas da totalmain 25,7 milliuns francs.
Fotografia agiuntada:
Infurmaziuns:
Urban Maissen, selvicultur chantunal, manader da l'Uffizi da guaud e privels da la natira, tel. +41 81 257 38 51 (cuntanschibel da las 10.00 fin las 11.00), e‑mail Urban.Maissen@awn.gr.ch
Responsabladad: Uffizi da guaud e privels da la natira