In guaud da protecziun saun e bain structurà garantescha segirezza duraivla a la populaziun grischuna. Quest guaud è a medem temp er il spazi da viver da blers animals selvadis che laschan natiralmain enavos fastizs. En differentas regiuns dal chantun Grischun èn ils donns da selvaschina gronds ed èn s'augmentads ils ultims onns. Questa situaziun da partenza cuntegna evidentamain potenzial da conflicts.

Cun la strategia concernent il «Spazi da viver guaud-selvaschina 2021» fixescha la Regenza ussa, co che questa situaziun duai vegnir meglierada. La strategia duai definir directivas surordinadas per ir enturn cun ils conflicts tranter il guaud e la selvaschina. Per schliar quests conflicts èn vegnidas definidas 10 finamiras e tut en tut 40 mesiras. En etappas da 5 onns duai il stadi dal guaud sa meglierar pass per pass fin l'onn 2035, e la regiuvinaziun natirala dal guaud duai puspè daventar pussaivla.