Il dretg da polizia en il chantun Grischun duai vegnir actualisà. La finamira è, che la Polizia chantunala possia proceder vinavant en moda efficazia ed effizienta cunter acts criminals ed impedir tals en il meglier cas. Per quest intent ha la Regenza deliberà trais missivas per duas revisiuns parzialas da la Lescha da polizia dal chantun Grischun e per l'aboliziun da l'Ordinaziun executiva tar la Lescha federala davart las materias explosivas.

Cun l'emprim project duain vegnir introducidas primarmain las basas giuridicas per il Management chantunal da smanatschas dal Grischun (MCS). Uschia vegn realisada ina recumandaziun da la Cumissiun parlamentara d'inquisiziun (CPI) Cartel da construcziun. Quest nov instrument da la polizia da segirezza duai gidar ad impedir grevs acts da violenza intenziunads. En quest connex sa tracti da violenza a chasa, da violenza cunter autoritads, d'extremissem violent e da radicalissem sco er d'autras furmas da greva violenza. Sco che las experientschas fatgas en auters chantuns mussan, pertutga la gronda part dals cas la violenza a chasa (cf. latiers ils exempels sin il fegl d'infurmaziun).

Deescalar a temp
Studis cumprovan che delinquentas e delinquents mussan savens uschenumnads signals d'avertiment avant che commetter grevs acts da violenza intenziunads. Tals signals èn tipics per in'escalaziun. Cun il Management chantunal da smanatschas dal Grischun duai vegnir stabilì in sistem che promova l'identificaziun da tals signals d'avertiment e che procura, che quests signals d'avertiment vegnian annunziads a la Polizia chantunala. La Polizia chantunala survegn uschia la pussaivladad d'identifitgar a temp persunas prontas d'utilisar violenza. Ella po valitar en moda fidada la ristga che resorta da las persunas e neutralisar questa ristga tras mesiras coordinadas sin plaun interdisciplinar. Per quest intent collavura la Polizia chantunala stretgamain cun autras autoritads, cun persunas spezialisadas, cun organisaziuns e persunas privatas che stattan en contact cun la persuna pronta d'utilisar violenza e cun sias victimas potenzialas.

Per pudair applitgar quest instrument da la polizia da segirezza en moda efficazia ed effizienta en il chantun Grischun, èsi necessari da precisar e d'extender las basas giuridicas concernent l'elavuraziun da datas.

Ultra da quai duai la Polizia chantunala survegnir la pussaivladad da pronunziar scumonds d'areal, d'avischinaziun e da contact cunter persunas periclitantas, sch'ins sto supponer – sin basa da las circumstanzas – che questas persunas commettian in malfatg cunter il corp, cunter la vita, cunter l'integritad sexuala u cunter la libertad u persequiteschian insatgi. Tras l'introducziun da questas mesiras spezialas cunter violenza, smanatschas u persecuziuns vegn il chantun Grischun a suandar la maioritad dals chantuns che han introducì mesiras polizialas correspundentas ils onns passads. Uschia vegn realisada ina incumbensa dal Cussegl grond concernent la creaziun d'ina basa legala en cas da stalking.

Ulteriuras actualisaziuns dal dretg da polizia
Cun la segunda revisiun parziala da la Lescha da polizia duain vegnir actualisads plirs champs dal dretg da polizia. En emprima lingia duain vegnir adattadas las basas legalas per la retschertga automatisada da vehichels. La retschertga automatisada da vehichels pussibilitescha a la Polizia chantunala da far registraziuns visualas da vehichels e da numers d'immatriculaziun per retschertgar persunas e chaussas sin vias publicas sco er da cumparegliar las datas registradas cun las datas da retschertga designadas. Las pretensiuns che la basa legala per quest instrument polizial sto ademplir, èn vegnidas precisadas dal Tribunal federal en duas decisiuns pli novas. En vista a questa giurisdicziun dal Tribunal federal na paran las regulaziuns actualas da la Lescha da polizia betg pli da bastar. Las regulaziuns ston perquai vegnir revedidas, per che la Polizia chantunala possia cuntinuar cun la retschertga automatisada da vehichels en la dimensiun giavischada.

Reorganisaziun dal dretg davart las materias explosivas
La terza missiva pertutga l'Ordinaziun executiva dal Cussegl grond tar la Lescha federala davart las materias explosivas dals 25 da mars 1977 (OECG tar la Lescha federala davart las materias explosivas; DG 350.320). L'ordinaziun sa basa directamain sin la Constituziun dal chantun Grischun. Talas uschenumnadas ordinaziuns autonomas n'èn da princip betg pli admessas dapi la revisiun totala da la Constituziun chantunala. Sch'ellas vegnan midadas, ston ellas da princip vegnir abolidas. Lur regulaziuns, uschenavant ch'ellas èn anc necessarias, ston vegnir transferidas en ina lescha u en in'ordinaziun. La OECG tar la Lescha federala davart las materias explosivas dovra ina revisiun en plirs reguards. Ella sto perquai vegnir abolida.

Il Cussegl grond vegn a tractar las trais missivas previsiblamain en la sessiun d'avust 2025.

Agiuntas:

Missiva concernent la revisiun parziala da la Lescha da polizia, part 1

Missiva concernent la revisiun parziala da la Lescha da polizia, part 2

Missiva concernent l'aboliziun da l'Ordinaziun executiva tar la Lescha federala davart las materias explosivas

Fegl d'infurmaziun Management chantunal da smanatschas (MCS)

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 11.00 fin las 12.00), e‑mail medienstelle@djsg.gr.ch

Responsabladad: Regenza