La Regenza ha surdà a la Repower SA la concessiun per l'ovra idraulica «Chlus». L'ovra idraulica duai furnir en l'avegnir electricitad per stgars 50 000 chasadas. Sco proxim pass spetga il chantun la dumonda d'approvaziun dal project.

Cun approvar la concessiun èn vegnidas stgaffidas las premissas, per che la Repower SA possia extender vinavant l'utilisaziun da la forza idraulica en il Partenz, quai en cumbinaziun cun l'ovra electrica existenta a Küblis. Cun il project «Chlus» duain l'aua turbinada da l'ovra electrica existenta da Küblis, las deflussiuns da la Landquart tschiffadas a Küblis sco er las auas lateralas da l'Arieschbach, dal Furnerbach e dal Schranggabach vegnir manadas tras ina gallaria da pressiun en il territori industrial da Trimmis. Da la nova ovra idraulica vegn l'aua restituida en il Rain. La prestaziun totala installada importa circa 62 megawatts e la producziun totala annuala en media circa 237 uras gigawatt. Uschia po il basegn d'electricitad da stgars 50 000 chasadas da quatter persunas vegnir cuvrì durant in onn. Ils custs d'investiziun per il project «Chlus» importan previsiblamain 445 milliuns francs.

Las 12 vischnancas concessiunaras – Küblis, Luzein, Fideris, Jenaz, Furna, Schiers, Grüsch, Seewis, Landquart, Malans, Zizers sco er Maiavilla – han approvà il project «Chlus» gia tranter il matg ed il zercladur 2014. En quest connex han ellas concedì a la Repower SA il dretg d'utilisar la forza idraulica da la Landquart, da l'Arieschbach, dal Furnerbach e dal Schranggabach sin il traject da Küblis fin a la sbuccada dal Rain.

Il project «Chlus» è in project d'impurtanza naziunala. En la Lescha federala davart in provediment d'electricitad segir cun energias regenerablas (uschenumnà decret general), ch'è vegnida acceptada en la votaziun federala dal pievel dals 9 da zercladur 2024, è il project «Chlus» menziunà cun num. L'interess da sia realisaziun ha da princip la precedenza envers auters interess naziunals.

«Il project ‹Chlus› è in project impurtant per il provediment d'energia persistent en il Grischun ed en l'entira Svizra», di la cussegliera guvernativa Carmelia Maissen, scheffa dal Departament d'infrastructura, energia e mobilitad. Ella sa legra ch'il project è ussa – cun l'approvaziun da la concessiun tras la Regenza – in grond pass vinavant.

Contribuziun decisiva a la sanaziun da las auas
Perquai che las consequenzas per la flora e per la fauna na sa laschan mai evitar dal tuttafatg en cas da projects d'ovras idraulicas, vegnan creads – sco cumpensaziun – novs spazis da viver equivalents u vegn augmentada la valur da spazis da viver existents. En il rom dal project «Chlus» duai vegnir revitalisà per quest intent dal tuttafatg in traject da var 4 kilometers dal Mühlbach ad Igis, ch'è actualmain per gronda part chanalisà ed artifizial. Cun realisar il project «Chlus» e cun eliminar uschia las midadas da la deflussiun da l'aua en la Landquart sin il traject tranter Küblis e la sbuccada en il Rain po plinavant vegnir prestada ina contribuziun decisiva a la sanaziun da las auas.

Sco proxim pass en la procedura d'approvaziun da dus stgalims spetga il chantun che la Repower SA inoltreschia la dumonda d'approvaziun dal project. Uschia vegn fixà in ulteriur element per cuntanscher las finamiras da la politica d'energia.

Visualisaziun:

©Repower SA

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad dal Grischun, tel. +41 81 257 36 05 (cuntanschibla da las 10.00 fin las 11.00), e‑mail Carmelia.Maissen@diem.gr.ch
• Beat Hunger, vicemanader da l'Uffizi d'energia e da traffic, tel. +41 81 257 36 26 (cuntanschibel da las 11.00 fin las 12.00), e‑mail Beat.Hunger@aev.gr.ch

Responsabladad: Regenza