Il nov program d'aglomeraziun Cuira è avant maun. La Regenza grischuna, las regiuns pertutgadas Landquart, Plessur e Plaun sco er las vischnancas l'han deliberà per mauns da la Confederaziun. La Confederaziun vegn ussa ad examinar il program. En cas d'in resultat positiv vegn ella a sa participar finanzialmain a las mesiras a favur d'ina mobilitad progressiva.
Da Maiavilla sur Cuira fin a Razén – la planisaziun surcommunala en las aglomeraziuns spessas è ina sfida. In instrument impurtant è il program d'aglomeraziun (PA) che ha la finamira da coordinar a medem temp il svilup da pliras vischnancas.
Dapi 2 onns vegn elavurà il nov program d'aglomeraziun da la 5. generaziun sut l'egida da l'Uffizi per il svilup dal territori. Quest program sa basa sin il PA precedent. Uschia èsi vinavant previs d'optimar las staziuns sco lieus da midar tren u bus, da concepir ulteriurs trajects da via en moda cumpatibla cun ils abitadis e da cumplettar vinavant l'infrastructura per il traffic da velos. La ruta da velo regiunala tranter Razén e Maiavilla vegn engrondida cun ulteriurs trajects e cumplettada cun axas da velo entaifer ils lieus. A Landquart vegnan ils hotspots a lunga vista dal svilup intern concretisads en planisaziuns da test. I dat er novs elements en il PA, sco ponderaziuns pli detagliadas davart il traffic da peduns, per exempel cun vias nuninterruttas tras ils quartiers da Cuira, ed in meglier resguard dals spazis libers e da las zonas verdas en ils abitadis.
Program cun grond sustegn
Las regiuns Plaun, Plessur e Landquart, lur vischnancas sco er plirs posts spezialisads dal chantun èn adina puspè sa participads a l'elavuraziun dal program. La capacitad da chargia en las vischnancas è impurtanta, perquai che la gronda part da las totalmain 90 mesiras vegnan realisadas sut l'egida da las vischnancas. Il chantun las sustegna en quest connex davart l'approvaziun da planisaziuns, tras la participaziun a la finanziaziun sco er sco post da contact envers la Confederaziun. Il PA deliberà sclerescha er las cumpetenzas per realisar las singulas mesiras.
La populaziun ha pudì s'exprimer dals 10 da schaner fin ils 8 da favrer 2025 davart il sboz dal program d'aglomeraziun. Durant questa exposiziun publica èn entradas 57 posiziuns. Ils resuns da questa cooperaziun èn sche pussaivel vegnids integrads en il PA5 ch'è ussa vegnì deliberà. Auters giavischs èn vegnids registrads sco inputs per in program successiv da la 6. generaziun. Inputs concrets tar singulas mesiras vegnan ils posts cumpetents dal chantun e da las vischnancas ad examinar sin plaun da las mesiras per mauns da la proxima approfundaziun e projectaziun.
Proxim pass: examinaziun tras la Confederaziun
Il program d'aglomeraziun stgaffescha las premissas per inoltrar a la Confederaziun ina dumonda da cofinanziar las mesiras per meglierar las infrastructuras dal traffic. Ils custs per las mesiras da traffic dal program d'aglomeraziun importan tut en tut var 134 milliuns francs. La contribuziun maximalmain pussaivla da la Confederaziun a quests custs importa 50 pertschient. Cun endatar il program cumenza ussa il process da controlla tar la Confederaziun. Il consentiment dal parlament federal al conclus da finanziaziun davart tut ils PA da la 5. generaziun è previs per la fin da l'onn 2027.
Links:
Infurmaziuns:
Boris Spycher, manader da project, Uffizi per il svilup dal territori tel. +41 81 257 23 06 (cuntanschibel da las 10.00 fin las 11.00), e‑mail Boris.Spycher@are.gr.ch
Responsabladad: Regenza