Ils proxims dis vegn publitgà da nov il mandat per manar il «Secretariat da la marca graubünden». Il chantun è proprietari da la marca graubünden ch'è etablida dapi passa 20 onns cun success sin il martgà. Il management da la marca vegn ademplì dapi l'onn 2017 d'in furnitur da servetschs extern.
Avant passa 20 onns è vegnida stgaffida la marca graubünden per il Grischun sco lieu economic. Dapi lura è la marca cun il logo dal capricorn stilisà s'etablida cun success sin il martgà. Sco proprietari da la marca graubünden investescha il chantun en il rom da la campagna «Enavant» annualmain var 1 milliun francs en differentas mesiras da communicaziun.
Dapi l'onn 2017 vegn la marca administrada d'in furnitur da servetschs extern en furma da mandat. Il chantun è l'incumbensader ed ha la responsabladad strategica per l'ulteriur svilup da la marca graubünden. Cun las valurs da marca «autentic», «agreabel» e «prospectiv» vegn il Grischun posiziunà sco spazi da viver, da lavur e da temp liber unic en las Alps.
Facit positiv davart la gestiun da la marca d'enfin ussa
L'onn 2024 ha il Departament d'economia publica e fatgs socials (DES) fatg in'evaluaziun externa dal «Secretariat da la marca graubünden». Igl è tranter auter vegnì analisà, co che la collavuraziun tranter il chantun, represchentà tras l'Uffizi per economia e turissem (incumbensader), ed il furnitur da servetschs extern (incumbensà) guarda ora e sche quest model duai vegnir tschernì er en l'avegnir. In rapport d'evaluaziun cumplessiv mussa in maletg positiv da la gestiun da la marca d'enfin ussa tras il furnitur da servetschs actual.
Per motivs dal dretg d'acquisiziun ed en vista al svilup futur dal mandat ha il DES decidì da puspè publitgar uffizialmain la direcziun dal secretariat suenter l'onn 2016. Cun quest pass duai vegnir stgaffida la basa per ch'il management da la marca saja, a partir da l'onn 2027, vinavant professiunal ed orientà al futur. L'acquisiziun publica cumenza ils proxims dis.
Infurmaziuns:
Marcus Hassler, secretari general, Departament d'economia publica e fatgs socials, tel +41 81 257 23 12 (cuntanschibel da las 10.00 fin las 11.00), e‑mail Marcus.Hassler@dvs.gr.ch
Responsabladad: Departament d'economia publica e fatgs socials