La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC) en connex cun midadas planisadas tar il provediment da basa cun servetschs postals. Tras adattaziuns en l'Ordinaziun da posta vuless il Cussegl federal dar a la Posta svizra dapli flexibilitad en connex cun la distribuziun ed uschia realisar il provediment da basa en moda pli effizienta e pli favuraivla. Correspundentamain duai il provediment da basa vegnir cumplettà cun in chanal da distribuziun digital e survegnir access al traffic da pajament electronic.

En sia posiziun accentuescha la Regenza, ch'ella saja conscienta da la situaziun finanziala pretensiusa en il sectur dal provediment postal da basa. Ella s'exprima però cleramain cunter la reducziun dal provediment postal da basa sin donn e cust da las regiuns muntagnardas e perifericas. Ina reducziun da las prestaziuns na dastga betg manar ad ina societad da duas classas. Il servetsch public postal sto ademplir en tut las regiuns dal pajais las medemas prescripziuns da qualitad.

Plinavant refusa la Regenza ils plans da betg pli distribuir la posta a chasas ch'èn abitadas l'entir onn, ch'èn però situadas ordaifer il territori d'abitadi. Quai è numnadamain dispitaivel ord vista da la politica democratica e periclitescha il provediment en il territori rural. Ina reducziun dastga succeder mo en plirs pass e mo, sch'i vegnan purschidas alternativas equivalentas (p.ex. consegna digitala). Las directivas da distribuziun per las medias stampadas, en spezial per las gasettas regiunalas, duain vegnir mantegnidas per proteger la diversitad da las medias e las linguas minoritaras. La Regenza beneventa ch'il provediment da basa duai vegnir cumplettà cun purschidas digitalas. Purschidas analogas ston dentant esser garantidas vinavant per segirar la libra tscherna.

Documents da consultaziun dal Departament federal per ambient, traffic, energia e communicaziun (DATEC)

En collavuraziun cun l'Uffizi federal d'ambient (UFAM) ha l'Uffizi da guaud e privels da la natira elavurà ina nova cunvegna da program Guaud 2025 – 2028, ch'è vegnida suttascritta da la cussegliera guvernativa Carmelia Maissen. Per las finamiras dals programs en ils secturs «Guaud» e «Privels da la natira gravitativs tenor la Lescha dal guaud» èn vegnidas concludidas prestaziuns voluminusas, che duain vegnir furnidas tranter auter dal chantun Grischun sco er da las proprietarias e dals proprietaris da guaud durant ils onns 2025 fin 2028. La Confederaziun sustegna las prestaziuns realisadas cun contribuziuns da totalmain var 76,84 milliuns francs per il sectur «Guaud» e var 24,74 milliuns francs per il sectur «Privels da la natira gravitativs tenor la Lescha dal guaud».

Er cun l'Uffizi federal da vias (UVIAS) ha l'Uffizi da guaud e privels da la natira elavurà ina cunvegna per ils onns 2025 fin 2028, ch'è vegnida suttascritta da la cussegliera guvernativa Carmelia Maissen. Cun questa cunvegna pon las mesiras per tgirar ils guauds da protecziun sco er per prevegnir e per eliminar donns da guaud per lung da vias naziunalas vegnir sustegnidas cun contribuziuns federalas da var 3,74 milliuns francs.

La Regenza ha approvà in project da la vischnanca da Poschiavo per la correcziun da la Val Beton ed ha garantì per quest intent contribuziuns tenor la Lescha davart la correcziun dals curs d'aua, tenor la Lescha davart las vias e tenor la cunvegna da program da la NGF cun la Confederaziun, quai en il sectur «Privels da la natira gravitativs tenor la Lescha davart la correcziun dals curs d'aua». Als custs budgetads dad 1,7 milliuns francs ha ella concedì ina contribuziun chantunala da maximalmain 791 350 francs e disponì ina contribuziun federala da maximalmain 595 000 francs.

L'aual da la Val Beton è in torrent che po chaschunar bovas, che nascha a la costa vest dal Sassalb e che sbucca en il Poschiavino. Ensemen cun l'aual lateral da la Val la Presa furma il torrent da la Val Beton in enorm cugn alluvial al fund da la val. Da vegl ennà smanatscha quest sistem d'auals – en cas d'auas grondas – il territori d'abitadi dal vitg da San Carlo sco er las ovras da meglieraziun agriculas dals conturns. Er la via dal Bernina H29 sa chatta en l'intschess da questas auas.

La gronda part dal sistem da rempars existent è vegnida construida ils onns 1992 e 1993. Suenter l'aua gronda dal 1987 han ins sanà respectivamain construì da nov tut en tut 29 rempars da torrent en la part d'amez da l'aual, quai per franar l'erosiun cuntinuanta dal letg da l'aual. Per cumplettar han ins er anc installà in collectur da glera. Ils onns 2017 e 2018 è il volumen da quest batschigl da retenziun vegnì augmentà da 4000 a 9000 meters cubic. Ultra da quai han ins stuì reparar e rinforzar quatter rempars da torrent donnegiads. Ils 12 da fanadur 2023 hai dà in ferm urizi sur l'intschess, che ha lura chaschunà in'aua gronda en la Val Beton. Ils rempars han ademplì lur funcziun. Els n'han dentant betg pudì impedir dal tuttafatg donns vi d'abitadis ed infrastructuras en ils conturns. Controllas suenter quest eveniment han plinavant mussà, che er parts dals rempars da l'aual èn vegnidas donnegiadas. Per garantir la protecziun cunter aua gronda en l'avegnir, ha la vischnanca da Poschiavo perquai decidì da reparar ils objects donnegiads e d'augmentar il volumen dal collectur da glera da 9000 a 10 000 meters cubic.

© biro WNT

La Regenza ha approvà la revisiun totala da la planisaziun locala da Flearda, che la vischnanca aveva concludì ils 30 da november 2023. Uschia vegnan stgaffidas las premissas per ademplir las prescripziuns dal dretg da planisaziun surordinà.

Sin basa da la Lescha federala davart la planisaziun dal territori e dal Plan directiv chantunal en il sectur da l'abitadi ha la vischnanca da Flearda examinà ed adattà las zonas da construcziun areguard la grondezza, la dimensiun e l'utilisaziun. Tut en tut ha ella reducì sias zonas d'abitar, maschadadas e dal center per var 4753 meters quadrat. La revisiun da la Lescha communala da construcziun cumpiglia particularmain l'augment da las cifras d'utilisaziun e da las dimensiuns dals edifizis en tut las zonas da construcziun, en moda ch'i vegn pussibilità da densifitgar la surfatscha d'abitadi. Plinavant è vegnida introducida in'obligaziun da construir entaifer in termin dad 8 onns en zonas da construcziun existentas. La finala è l'entir project da planisaziun vegnì accordà cun ils pli novs plans da la mesiraziun funsila e cun las prescripziuns da la digitalisaziun. En quest connex èn er ils inventaris da la protecziun da la natira e da la cuntrada sco er ils privels da la natira vegnids resguardads ed integrads en la planisaziun locala.

© Comet Photoshopping ScRL, Dieter Enz

La Regenza ha elegì Nahid Kouchekzadeh Dandansaz e Leo Bassy sco nova commembra respectivamain nov commember da la Cumissiun d'integraziun. L'elecziun è per il rest da la perioda d'uffizi, pia dal 1. d'avust 2025 fin ils 30 da zercladur 2026. La nova commembra ed il nov commember suondan sin Thomas Rüegg ed Ilhan Mohamed Aden, che han declerà lur demissiun da la Cumissiun d'integraziun. Thomas Rüegg ha motivà sia demissiun cun la terminaziun da ses mandat sco cusseglier communal a Tusaun ed Ilhan Mohamed Aden cun sia partenza davent dal chantun Grischun. La Regenza engrazia per ils servetschs prestads.