Il chantun Grischun dispona d'in nov portal da datas per publitgar datas administrativas publicas (open government data – OGD). La purschida è la basa per ina politica da datas progressiva en l'administraziun chantunala. Cun la publicaziun dad OGD promova il chantun Grischun plinavant ina perscrutaziun ed economia innovativa, sco er ina meglra transparenza da l'agir public envers la societad e la politica.

Il chantun registrescha ed administrescha in grond dumber da datas administrativas publicas. En in mund dominà da datas èn talas d'ina valur enorma. En l'avegnir duain las datas vegnir messas a disposiziun per la libra utilisaziun entaifer sco er ordaifer l'administraziun.

Il sectur spezial Datas e statistica da l'Uffizi per economia e turissem sviluppa la purschida dad OGD en il rom da la «Strategia Administraziun digitala Grischun 2024–2028». En collavuraziun cun ils posts da servetsch vegn la purschida engrondida cuntinuadamain ils proxims onns.

En quest connex stattan ils suandants princips en il center:

• Datas stgaffeschan transparenza e confidenza
  Cun publitgar datas che resultan da la lavur quotidiana, na vegn betg mo stgaffida transparenza davart l'activitad administrativa, mabain er ina basa per discussiuns e decisiuns en la societad.
• Datas sco basa per l'innovaziun
  Las datas publitgadas pon vegnir duvradas per projects innovativs, per ideas commerzialas e per sviluppar applicaziuns.
• Gestiun da datas effizienta
  Tras in portal central na vegnan OGD betg arcunadas pliras giadas tar ils posts da servetsch. Quai augmenta l'effizienza.
• Utilisaziun simpla
  Las datas stattan a disposiziun gratuitamain en in format standardisà ad auters posts da servetsch sco er a persunas ed ad organisaziuns externas. Quai augmenta vinavant il niz e la valur da las datas.

Il portal da datas cumpiglia gia ussa ina purschida da basa d'unitads da datas sco er visualisaziuns da tscherts temas. Cun emprims dashboards pon las utilisadras ed ils utilisaders plinavant obtegnair ina survista svelta ed actuala davart ils svilups e las tendenzas da temas fitg dumandads. Il culp da partenza dal portal da datas è la basa tecnica per sviluppar vinavant la purschida dad OGD en l'administraziun chantunala. Ils proxims onns vegn la purschida engrondida cuntinuadamain en collavuraziun cun ils posts da servetsch.

Il portal da datas dal chantun Grischun pon ins consultar sut il suandant link: data.gr.ch

Agiunta:

Dumondas e respostas davart open government data

Infurmaziuns:

• President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
• Luzius Stricker, manader da la partiziun Datas e statistica, Uffizi per economia e turissem, tel. +41 81 257 23 74 (cuntanschibel da las 13.30 fin las 16.00), e‑mail Luzius.Stricker@awt.gr.ch

Responsabladad: Departament d'economia publica e fatgs socials