Il minister dal stadi bavarais per ambient e protecziun dals consuments, Thorsten Glauber, ha visità ils 25 e 26 da zercladur 2025 il chantun Grischun, quai en il rom d'in viadi da plirs dis tras la Svizra. L'emprim di ha el inscuntrà a Scuol il cusseglier guvernativ Jon Domenic Parolini per in discurs davart las sfidas actualas da la politica d'ambient. La visita da dus dis en l'Engiadina Bassa ha er cumpiglià in barat cun la presidenta communala da Scuol, Aita Zanetti, ina visita en il Parc Naziunal Svizzer e discurs cun il directur dal Parc Naziunal, Ruedi Haller, e cun il president da la Cumissiun da perscrutaziun, Markus Stoffel.
En il center da la visita a Scuol è stà in discurs bilateral cun il cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, davart las sfidas actualas da la politica d'ambient sin plaun regiunal ed internaziunal. Tranter auter èn vegnidas discutadas dumondas davart la protecziun da la biodiversitad e da las auas, il tractament da neobiotas, l'impurtanza e las cundiziuns generalas dal Parc Naziunal Svizzer sco er mesiras en connex cun l'adattaziun al clima ed en connex cun il management da privels da la natira. Vegnidas discussiunadas èn er eventualas furmas da l'ulteriura collavuraziun en il sectur da la protecziun da l'ambient e da la natira tranter la Baviera ed il chantun Grischun. «Las sfidas da la politica d'ambient e dal clima na sa ferman betg als cunfins naziunals. Il barat direct cun nossas regiuns partenarias ha perquai ina gronda valur», ha accentuà il cusseglier guvernativ Jon Domenic Parolini.
Il minister d'ambient da la Baviera Thorsten Glauber ha suttastritgà: «La Baviera appreziescha la cooperaziun lunga e plain confidenza cun la Svizra, particularmain cun il chantun Grischun. Pervia da la situaziun autalpina sentan ins qua pli baud e pli intensivamain las consequenzas da la midada dal clima. La Baviera ha uschia la pussaivladad da profitar da las experientschas svizras, tranter auter en il management da privels da la natira. Nus ans orientain a la Svizra ed elavurain tranter auter ina valisch da communicaziun davart ils privels da la natira, e quai tenor ils models svizzers. Jau engraziel per il cordial bainvegni e per il barat avert.»
Visita d'ina alp en il territori da Ftan sco er dal Parc Naziunal Svizzer
Ensemen cun la presidenta communala Aita Zanetti ha la delegaziun lura visità in'alp autsituada en il territori da Ftan. En il focus èn stads là ils temas davart la protecziun da muntaneras e la coexistenza cun animals da rapina gronds. Persunas spezialisadas han dà ina invista da lur experientschas praticas cun chauns da protecziun da muntaneras e cun l'economia d'alp. Ulteriuras discussiuns davart privels da la natira sco bovas ed eveniments d'aua gronda han cumplettà l'emprim di da la visita. Per la gievgia ha il program previs ina visita dal Parc Naziunal Svizzer. Suenter in bainvegni tras la direcziun dal parc han las participantas ed ils participants survegnì invistas captivantas da la nova exposiziun «Natüra sulvadia i'l center» sco er da projects actuals da perscrutaziun e da furmaziun en connex cun la midada dal clima, il management dals visitaders e la biodiversitad. Ils novs projects transcunfinals dad INTERREG per promover la protecziun da la natira èn vegnids accentuads spezialmain.
«Sco unic parc naziunal da la Svizra èn ils vischins da la Bavaria dapi decennis in partenari impurtant per nus. Cun els avain nus adina puspè realisà projects da perscrutaziun e discutà dumondas da management», ha declerà il directur dal Parc Naziunal Ruedi Haller.
Fotografias agiuntadas:
Da sanestra: cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, Aita Zanetti, presidenta communala da Scuol e Thorsten Glauber, minister dal stadi bavarais per ambient e protecziun dals consuments
Hans Lozza, manader da communicaziun e da lavur da publicitad, Dr. Ruedi Haller, directur dal Parc Naziunal Svizzer, Thorsten Glauber, minister dal stadi bavarais per ambient e protecziun dals consuments e prof. dr. Markus Stoffel, president da la Cumissiun da perscrutaziun
Infurmaziuns:
Dr. Jon Domenic Parolini, cusseglier guvernativ, schef dal Departament d'educaziun, cultura e protecziun da l'ambient
Las dumondas vegnan coordinadas dad Yvonne Brigger, responsabla per la communicaziun dal Departament d'educaziun, cultura e protecziun da l'ambient, tel. +41 81 257 44 66, e‑mail Yvonne.Brigger@ekud.gr.ch
Responsabladad: Departament d'educaziun, cultura e protecziun da l'ambient