Las dumbraziuns 2025 mussan, che las populaziuns da tschiervs èn sa diminuidas marcantamain cumpareglià cun l'onn avant. Er ils resultats tar ils chavriels inditgeschan populaziuns sminuintas. Allegraivel è er il dumber da las lieurs brinas, ch'è uschè aut sco anc mai. Cun la regulaziun da las populaziuns da selvaschina gida la chatscha en moda decisiva a cuntanscher las finamiras, ch'èn definidas en la strategia «Spazi da viver guaud-selvaschina 2021».

La stimaziun da las populaziuns da la primavaira 2025 mussa, che la chatscha ha ademplì l'onn passà sia incumbensa da reducir ils dumbers da tschiervs. Cun 13 585 tschiervs vegni stimà, che la populaziun da tschiervs chantunala saja sa reducida per 640 animals cumpareglià cun l'onn avant. «La chatscha intensiva dals ultims onns ha ussa procurà per ina reducziun dal dumber da tschiervs er en ils territoris problematics areguard il guaud e la selvaschina da la Val dal Rain, dal Partenz, dal Scanvetg e da la Tumleastga», di Adrian Arquint. En ils territoris da test da chavriels èn vegnids dumbrads la primavaira 923 animals. Quai èn bundant 100 chavriels pli pauc che l'onn avant. Ultra da quai vegnan ils chavriels er dumbrads tar las taxaziuns dals tschiervs. En quest connex han ins registrà quest onn 3302 chavriels (2024: 3488). Quant gronds ch'ils dumbers da chavriels èn effectivamain, vegn pir a sa mussar a maun da la preda da bucs-chavriel da la chatscha auta.

En pliras regiuns han ins cuntanschì la reducziun giavischada
En la strategia «Spazi da viver guaud-selvaschina 2021» è la reducziun da las populaziuns da selvaschina d'ungla vegnida definida sco mesira impurtanta per meglierar la situaziun chantunala da guaud-selvaschina. Las chatschadras ed ils chatschaders han fatg gronds sforzs ed uschia reducì la populaziun da tschiervs per 17 pertschient en cumparegliaziun cun l'onn 2020 (2705 tschiervs). «En 19 da las 21 regiuns da tschiervs correspunda il svilup dal dumber da tschiervs a la finamira da la strategia «Spazi da viver guaud-selvaschina 2021», di Adrian Arquint. Durant la chatscha da quest onn pon – tenor il plan da prelevaziun – vegnir sajettads 4835 tschiervs (2024: 4964 tschiervs), quai cun ina cumpart da 2638 animals feminins (2024: 2867). La chatscha da chamutschs e da chavriels ha lieu en la gronda part da las regiuns en il rom dals onns avant. Sulettamain sisum la Surselva vegn restrenschida pli fitg la chatscha da chauras-chamutsch sur il cunfin dal guaud, perquai ch'il dumber da chamutschs è anc adina bass là. Per la regiuvinaziun persistenta dals guauds èsi en bleras regiuns fitg impurtant, che las chatschadras ed ils chatschaders fetschian er en il guaud ina chatscha intensiva sin chauras-chavriel e sin chamutschs.

Dumbrà blera selvaschina manidla
Las populaziuns da selvaschina manidla vegnan survegliadas en il Grischun tras in monitoring annual intensiv. Ils emprims resultats da las dumbraziuns da las populaziuns mussan, che tant il dumber da lieurs sco er da giaglinas da draussa è quest onn en blers territoris stabil u levamain creschent. A chaschun da las dumbraziuns da tschiervs èn vegnidas dumbradas er 1242 lieurs brinas. Quai è la pli gronda quantitad d'animals ch'ins ha dumbrà fin ussa. Las Prescripziuns da chatscha dals onns passads èn sa cumprovadas per ina chatscha persistenta sin questas spezias. Perquai vegnan ellas applitgadas vinavant. Las chatschadras ed ils chatschaders èn conscients da lur responsabladad che resulta tras questa chatscha. Cun lavurs da tgira s'engaschan ellas ed els perquai activamain per questas e per bleras autras spezias d'animals e da plantas.

Ulteriuras infurmaziuns:

Termins da chatscha 2025

Agiunta:

Prescripziuns da chatscha

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Adrian Arquint, manader da l'Uffizi da chatscha e pestga dal Grischun, tel. +41 81 257 38 91 (cuntanschibel da las 09.30 fin las 11.00), e‑mail Adrian.Arquint@ajf.gr.ch

Responsabladad: Regenza