Venderdi, ils 25 da fanadur 2025, metta l'Uffizi da construcziun bassa uffizialmain en funcziun la nova punt da la Val da Tersnaus. La punt meglierescha il trassé da la via da Val S. Pieder tranter Uors e Sontga Catrina e collia l'architectura d'inschigneria moderna resguardond la cuntrada.
Suenter in temp da construcziun da var 2 onns remplazza l'Uffizi da construcziun bassa (UCB) la punt da la chavorgia d'Uors, che sto vegnir sanada, cun la nova punt da la Val da Tersnaus. Il trassé sco er il confort da viagiar da la via da Val S. Pieder vegnan uschia meglierads en moda persistenta. Durant il temp da construcziun ha il traffic pudì circular senza restricziuns pli grondas sur la punt existenta da la chavorgia d'Uors.
Ina construcziun innovativa en in territori pretensius
La nova punt traversa la Val da Tersnaus tranter duas paraids-crap taissas cun ina construcziun sparunada eleganta da betun armà. Quella permetta ina moda da construir filigrana malgrà la gronda purtada da stgars 48 meters. La punt existenta da la chavorgia d'Uors resta e daventa proprietad da la vischnanca da Lumnezia. Questa punt vegn duvrada en il futur per l'economia forestala e per il traffic betg motorisà e reparada correspundentamain dal UCB.
«Tranter funcziunalitad ed estetica»: L'info dal UCB per persunas che s'interessan per dumondas tecnicas
Ulteriuras infurmaziuns davart la construcziun e davart la planisaziun da la punt chattais Vus en l'info actuala dal UCB.
Fotografia agiuntada:
La punt da la Val da Tersnaus cun ina purtada da var 48 meters
Infurmaziuns:
Matthias Wielatt, schef Construcziuns artifizialas e substitut da l'inschigner chantunal, Uffizi da construcziun bassa, tel. +41 81 257 37 77 (cuntanschibel da las 09.00 fin las 11.30), e-mail Matthias.Wielatt@tba.gr.ch
Responsabladad: Uffizi da construcziun bassa