La cussegliaziun da geniturs per famiglias da la Surselva cun uffants da 0 fin 5 onns survegn ina nova direcziun. A partir dal schaner 2026 surdat l'Uffizi da sanadad dal Grischun la responsabladad per la cussegliaziun da geniturs a l'Uniun Canorta Igniv. En cunvegnientscha ed en collavuraziun cun l'Ospital regiunal Surselva è vegnida decidida ina nova orientaziun organisatorica.
A partir dal schaner 2026 vegn la cussegliaziun da geniturs per famiglias en Surselva realisada da l'Uniun Canorta Igniv. L'Uniun Canorta Igniv vegn a porscher ina cussegliaziun da geniturs cumplessiva e coordinada. L'Uniun Canorta Igniv exista dapi l'onn 2018. Ella è in patrun da lavur attractiv che maina canortas d'uffants a Glion, Laax e Flem.
Igl è previs, che l'Uniun Canorta Igniv realiseschia ensemen cun l'Uffizi da sanadad dal Grischun in project da pilot da 2 onns, quai a partir dal schaner 2026 fin il december 2027. Uschia èsi pussaivel da trair a niz en moda effizienta resursas, savida spezialisada e sinergias per sviluppar ina vasta purschida da sustegn ch'è accessibla per famiglias e che gida a promover en moda cumplessiva l'uffanza tempriva en tut la regiun Surselva.
Il servetsch da la cussegliaziun da geniturs vegn cuntinuà e sviluppà vinavant
Il servetsch ha er en l'avegnir num «Cussegliaziun da geniturs dal Grischun» e vegn manà da l'Uniun Canorta Igniv. Organisatoricamain vegn il servetsch separà da las purschidas existentas da l'uniun. Per la cussegliaziun da geniturs engascha l'uniun persunal spezialisà adattà. Fin che l'Uniun Canorta Igniv surpiglia la purschida, vegn la cussegliaziun da geniturs purschida sco usità da l'Ospital regiunal Surselva (elternberatung.gr.ch).
Infurmaziuns:
Denise, Rudin, manadra dal Post spezialisà per la promoziun da la sanadad, Uffizi da sanadad dal Grischun, tel. +41 81 257 64 02, e‑mail Denise.Rudin@san.gr.ch
Responsabladad: Uffizi da sanadad