Er l'onn 2024 èn bleras persunas sa drizzadas per l'emprima giada a l'Agid a victimas dal Grischun: Tut en tut han 501 novas persunas tschertgà sustegn – quasi uschè bleras sco l'onn 2023 (508). Il dumber total da cas che han fatg diever d'ina cussegliaziun è sa reducì levamain en cumparegliaziun cun l'onn precedent.
La cussegliaziun da l'Agid a victimas sa drizza a persunas ch'èn vegnidas donnegiadas corporalmain, psichicamain u sexualmain tras in malfatg en Svizra. La cussegliaziun è gratuita, confidenziala e sin giavisch anonima. La cussegliaziun stat a disposiziun a tut las persunas pertutgadas, independentamain da la vegliadetgna, da l'orientaziun sexuala, da l'identitad sexuala u da l'appartegnientscha religiusa. Medemamain n'emporti betg, da tge pajais ch'ina persuna pertutgada deriva, sch'ella è domiciliada a lunga vista en Svizra u en tge chantun ch'ella abita. En cas da basegn consulteschan las persunas spezialisadas da l'Agid a victimas servetschs d'interpretaziun e sa drizzan als basegns da las victimas.
Leva reducziun dal dumber total da cas da cussegliaziun
Ensemen cun ils cas da cussegliaziun currents ha l'Agid a victimas dal Grischun cusseglià l'onn 2024 tut en tut 829 victimas da violenza. Perquai ch'ins ha pudì serrar giu pli blers cas ils ultims onns, è il dumber total da cas da cussegliaziun sa reducì levamain cumpareglià cun il 2023.
Grafica 1: Post da cussegliaziun per l'agid a victimas dal Grischun / Svilup dals dumbers da cas 2017–2024
*Adattaziun da la registraziun statistica l'onn 2023
Vinavant bleras cussegliaziuns en connex cun violenza a chasa
Stgars la mesadad (47 pertschient) da las persunas pertutgadas da violenza ch'èn sa drizzadas a l'Agid a victimas, han subì violenza fisica, psichica u sexuala en la famiglia u en il partenadi. En cifras absolutas sa mussa ina leva reducziun da 424 a 393 cas. Ils motivs respectivs n'èn betg enconuschents.
En cas da violenza a chasa vegni per il solit rapportà d'incidents da violenza cun plirs causals penals. Betg darar s'augmentan l'intensitad da la violenza e la frequenza, sche la persuna pertutgada ha l'intenziun da sa separar. Ina cussegliaziun tras persunas spezialisadas da l'Agid a victimas vegn perquai recumandada en questas situaziuns gia avant ch'ins communitgescha l'intenziun da sa separar, en spezial sch'ins ha tema d'ina escalaziun violenta.
La violenza a chasa cumpiglia tut las furmas da violenza corporala, sexuala, psichica ed economica e pertutga persunas da tut las schlattainas e da tut las vegliadetgnas. Il pli savens vegn ella commessa entaifer la famiglia e la chasada. Ella po dentant er pertutgar persunas ord relaziuns actualas ed anteriuras, che na vivan betg en la medema chasada. Las consequenzas per la sanadad e per la vita sociala da las persunas pertutgadas èn per part gravantas. Ultra da la suffrientscha individuala chaschuna la violenza a chasa auts custs consecutivs per la societad.
Blers malfatgs cunter l'integritad sexuala
21 pertschient dals totalmain 1036 malfatgs registrads pertutgan acts chastiabels en il sectur da la violenza sexuala envers persunas creschidas, giuvenils ed uffants. Ils acts chastiabels cunter l'integritad sexuala cumpiglian tut ils delicts che han en ina moda u l'autra in connex cun la sexualitad. Ultra da constricziuns sexualas, violaziuns ed acts sexuals cun uffants survegn l'Agid a victimas dal Grischun ils ultims onns adina dapli dumondas davart delicts sexuals online. Qua sa tracti da delicts che vegnan commess sur l'internet u cun agid da tecnologias digitalas. Latiers tutga per exempel la sextorsiun, nua che persunas pertutgadas vegnan messas sut squitsch cun fotografias e videos intims. Er giuvenils èn pertutgads.
Grafica 2: Post da cussegliaziun per l'agid a victimas dal Grischun
Frequenza dals malfatgs rapportads en pertschient (las victimas han er pudì numnar plirs malfatgs)
En situaziuns acutas èsi impurtant, che las victimas sa drizzian a la centrala d'alarm da la polizia. Ultra da quai datti en il Grischun purschidas sco la Chasa da dunnas dal Grischun, il «Schlupfhaus» da l'Ospital d'uffants dal Grischun u l'ura da consultaziun Forensic Nursing en l'Ospital chantunal dal Grischun per persunas pertutgadas da violenza.
L'Agid a victimas è occupà durant las uras da biro ordinarias. En situaziuns acutas porscha el in termin da cussegliaziun entaifer 24 uras. Ultra da las emprimas mesiras cumpiglia la cussegliaziun en ina situaziun da crisa er agid psicologic e giuridic sco er infurmaziuns. En cas da basegn vegnan intermediadas persunas spezialisadas dal sectur medicinal, terapeutic e giuridic.
Ulteriuras infurmaziuns davart l'Agid a victimas chattais Vus sin la pagina d'internet da l'Uffizi dal servetsch social.
Infurmaziuns:
Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 11.00 fin las 12.00), e‑mail Susanna.Gadient@soa.gr.ch
Responsabladad: Uffizi dal servetsch social