La Regenza ha nominà dr. phil. Duri Blumenthal sco cumissari da la Regenza per la vischnanca da Sagogn. Quest pass è necessari, perquai che la suprastanza communala da Sagogn n'è betg pli abla da decider pervia da differentas demissiuns. Las elecziuns substitutivas èn fixadas per ils 23 d'october 2025. Il mandat dal cumissari da la Regenza finescha, uschespert che la suprastanza communala è puspè cumpletta.

La suprastanza communala da Sagogn consista tenor la constituziun communala vertenta da tschintg persunas. Per che la suprastanza communala saja abla da decider, ston esser preschents almain trais commembers da la suprastanza. Pervia da pliras demissiuns consista la suprastanza communala da Sagogn actualmain mo da duas persunas. Uschia n'è l'autoritad betg pli occupada confurm a la constituziun e n'è perquai betg abla da decider. La nominaziun d'in cumissari da la Regenza garantescha, che la suprastanza communala saja puspè abla d'agir e da decider.

La Regenza surdat questa incumbensa a Duri Blumenthal sco cumissari da la Regenza. L'anteriur president communal da Lumnezia e mainagestiun da la regiun Surselva durant blers onns ha experientschas cumprovadas en il champ d'incumbensas d'ina vischnanca ed enconuscha las relaziuns politicas e socialas en la regiun.

Il cumissari da la Regenza ha il dretg da sa participar a las sesidas da la suprastanza communala e da dar il dumber da vuschs ch'è necessari per decider. El n'è betg lià a directivas da la suprastanza. El po pia giuditgar da libra voluntad ina fatschenta, s'exprimer en chaussa e votar correspundentamain. En enclegientscha vicendaivla cun la suprastanza communala po el surpigliar er ulteriuras incumbensas operativas u strategicas per distgargiar ils auters commembers da la suprastanza. Il cumissari da la Regenza sustegna ultra da quai la vischnanca d'occupar tut ils sezs da la suprastanza communala. Il mandat finescha, cura che la suprastanza è puspè cumpletta.

Cun questa mesira sustegna la Regenza la vischnanca da Sagogn. A medem temp appellescha ella a las votantas ed als votants da s'engaschar per lur vischnanca e da sa participar activamain a las elecziuns da l'october 2025.

La petiziun «Grischun – LASCHAR LA DETTA dals chagniels lufs!», suttascritta da tut en tut 17 029 persunas, è vegnida inoltrada ils 7 d'avust 2025 sin via electronica a la Regenza da las organisaziuns Associaziun svizra per la protecziun dals animals selvadis, CHWOLF e Wolfs-Hirten. La petiziun vegn er sustegnida da las organisaziuns «Defend The Wolf», «Wolf Facts Schweiz», «Avenir Loup Lynx Jura» e «Komitee gegen Wolfsabschüsse».

Las petiziunarias ed ils petiziunaris supplitgeschan il chantun da renunziar a la regulaziun dals animals giuvens en il chantun Grischun cun agid da las chatschadras e dals chatschaders da patenta. Cun la regulaziun da basa, che prevesa da sajettar fin dus terzs dals chagniels lufs en il Grischun, vegnia surpassada ina lingia cotschna. Questa mesira saja sproporziunada, malgista e senza scrupels. La Regenza ha prendì enconuschientscha da la petiziun «Grischun – LASCHAR LA DETTA dals chagniels lufs!».

Enconuschientscha da la petiziun

La San Murezzan Energia maina l'ovra electrica Islas sper l'En en las vischnancas da San Murezzan e da Schlarigna. L'ovra electrica chaschuna differenzas da la deflussiun e dal livel da l'aua. Chaschunadas vegnan questas differenzas tras midadas da la deflussiun da l'aua sin il traject tranter la restituziun da l'aua da l'ovra electrica Islas e la sbuccada dal Flaz. La Regenza ha obligà la societad d'ovras electricas da planisar e da realisar mesiras da sanaziun per eliminar quests disturbis. Per quest intent sto la San Murezzan Energia inoltrar al chantun fin il pli tard la stad 2027 mesiras approvablas e realisablas.

La Regenza ha prendì enconuschientscha dal fatg, ch'ils suandants projects federals vegnan suttamess a la votaziun dal pievel dumengia, ils 30 da november 2025:

• Iniziativa dal pievel «Per ina Svizra che s'engascha (Iniziativa servetsch civic)»;
• Iniziativa dal pievel «Per ina politica dal clima sociala finanziada en moda fiscalmain gista (Iniziativa per l'avegnir)».

Sin plaun chantunal vegni votà davart la suandanta fatschenta:

• Iniziativa chantunala dal pievel «Finì cun il paracrudada dad aur per commembras e commembers da la Regenza – Na a la pensiun per vita duranta» e cuntraproposta dal Cussegl grond «Revisiun parziala da la Lescha davart ils salaris e davart la prevenziun professiunala da las commembras e dals commembers da la Regenza».