L'Uffizi da vischnancas organisescha oz suentermezdi la settavla dieta da vischnancas en l'Arena grischuna a Cazas. Spetgadas vegnan passa 270 commembras e commembers d'autoritads ed emploiadas ed emploiads da quasi tut las vischnancas grischunas sco er ulteriuras persunas interessadas. La cussegliera guvernativa Carmelia Maissen, ils cussegliers guvernativs Martin Bühler e Peter Peyer sco er ulteriuras persunas spezialisadas infurmeschan davart las fatschentas actualas ch'èn d'in interess spezial per las vischnancas.
L'Uffizi da vischnancas dal Grischun (UV) envida mintga dus onns a la dieta da vischnancas. Questa occurrenza ch'è gia daventada ina tradiziun ha lieu mintgamai durant l'emna senza chatscha en l'Arena grischuna a Cazas. La settavla ediziun preschenta puspè ina paletta variada d'infurmaziuns che vegn a chattar grond interess tar las represchentantas ed ils represchentants da las vischnancas. Var 270 persunas han annunzià lur participaziun al suentermezdi dad oz.
La represchentanta ed ils represchentants da la Regenza grischuna ch'èn da la partida, sa legran dal grond interess per la dieta da vischnancas. Quest barat regular tranter il chantun e las vischnancas è ina plattafurma bainvegnida per il transfer da savida e vegn utilisà gugent da la commembra e dals commembers da la Regenza sco er da las autoritads communalas.
Actualitads dal Departament da finanzas e vischnancas
Il cusseglier guvernativ Martin Bühler infurmescha tranter auter davart las proximas adattaziuns en il sectur fiscal, ch'il Cussegl grond ha concludì durant la sessiun d'avust. Da Thomas Kollegger, il manader dal UV che organisescha l'occurrenza, survegnan las persunas preschentas differentas infurmaziuns concernent las statistica da finanzas sco er concernent las cifras davart la gulivaziun da finanzas ch'èn vegnidas publitgadas dacurt. Plinavant preschenta el il Mussavia per las autoritads communalas ch'è resultà en collavuraziun cun la Scola auta spezialisada dal Grischun e ch'è gist sortì da la stampa. Quest mussavia inditgescha curt e survesaivlamain ils differents champs d'incumbensas da las vischnancas e duai facilitar l'entrada en uffizi cunzunt a novas commembras ed a novs commembers d'autoritads.
Ensemen cun Anita Capaul, coordinatura per las vischnancas dal Post da stab Administraziun digitala, infurmescha il cusseglier guvernativ Martin Bühler davart il stadi actual da la Strategia Administraziun digitala e davart la collavuraziun cun las vischnancas. In'attenziun speziala survegn il sectur segirezza virtuala.
«Strategia da forza idraulica dal chantun Grischun 2022 – 2050» e «Provediment decentral da la sanadad en il Grischun 2026 – 2036»
Il tema «Provediment decentral da la sanadad en il Grischun 2026 – 2036» vegn explitgà dal cusseglier guvernativ Peter Peyer. La cussegliera guvernativa Carmelia Maissen infurmescha las participantas ed ils participants davart il stadi da realisaziun da la «Strategia da forza idraulica dal chantun Grischun 2022 – 2050».
Serrar il cerchel d'infurmaziuns serra il directur da l'Assicuranza d'edifizis dal Grischun, dr. Marc Handlery. El discurra davart ils projects en il sectur dals fatgs da pumpiers.
Barat e stans d'infurmaziun
Durant in apero suenter ils referats pon ils giasts sa barattar persunalmain cun las persunas spezialisadas a differents stans d'infurmaziun. Quest concept cumprovà chatta grond interess tar ils expositurs ed ils giasts.
Infurmaziuns:
- Cussegl guvernativ Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch, pussaivladads da far intervistas en il rom da la dieta da vischnancas
- Simon Theus, manader Projects, Uffizi da vischnancas, tel +41 81 257 23 87, e‑mail Simon.Theus@afg.gr.ch
Responsabladad: Departament da finanzas e vischnancas