En la Val Poschiavo han ins chattà glindesdi, il 1. da settember 2025, in luf mort. Ils emprims scleriments da la surveglianza da chatscha han mussà, ch'il luf è vegnì blessà mortalmain tras in sajet. La Polizia chantunala ha instradà las inquisiziuns.

Per la Val Poschiavo n'èn actualmain avant maun naginas permissiuns da sajettar lufs. Per sclerir las circumstanzas da quest cas ha la surveglianza da chatscha locala cumenzà immediatamain cun las retschertgas necessarias, quai en collavuraziun cun la Polizia chantunala dal Grischun.

L'animal mort è in mastgel. Per l'ulteriura analisa forensica e biologica è il cadaver dal luf vegnì surdà al Center per medischina da peschs e selvaschina (FIWI) a Berna. Las retschertgas duain tranter auter purtar indizis davart l'andament dal cas. L'analisa genetica vegn fatga dal Laboratori da biologia da conservaziun da l'Universitad da Losanna.

Infurmaziuns:

Adrian Arquint, co-manader da l'Uffizi da chatscha e pestga, tel +41 81 257 38 91 (cuntanschibel da las 11.00 fin las 12.00), e‑mail Adrian.Arquint@ajf.gr.ch

Responsabladad: Uffizi da chatscha e pestga