L'Uffizi da construcziun bassa dal Grischun cuntinuescha cun las meglieraziuns da la signalisaziun e da la communicaziun d'impediments da traffic en l'Engiadin'Ota ed en la Bregaglia. Sche vias vegnan serradas, vegnan prendidas l'enviern proxim – en ina fasa d'emprova – mesiras per diriger il traffic e messas a disposiziun pussaivladads da parcar temporaras. Ils discurs da lavuratori en las regiuns Malögia e Bernina èn sa cumprovads.

A San Murezzan ha gì lieu gievgia, ils 11 da settember 2025, in ulteriur inscunter tranter l'Uffizi da construcziun bassa e represchentantas e represchentants dals secturs turissem, economia, politica, fatgs da sanadad e traffic public. A chaschun da quest terz discurs da lavuratori èn vegnidas explitgadas las ulteriuras meglieraziuns en connex cun impediments da traffic e cun la communicaziun da tals en las regiuns Malögia e Bernina. La nova signalisaziun LED ch'è vegnida en funcziun da nov l'enviern passà, è sa cumprovada: Las utilisadras ed ils utilisaders da la via èn fitg cuntents e vesan ina clera meglieraziun per la circulaziun dal traffic. La plattafurma d'internet strassen.gr.ch, ch'è vegnida lantschada da nov, è dal rest vegnida consultada var in milliun giadas sur l'entir chantun tranter il november 2024 e l'avrigl 2025. Ed a las utilisadras ed als utilisaders en la regiun che han abunà quest servetsch, èn vegnidas tramessas 1280 communicaziuns davart il stadi da las vias.

Pervia da l'enviern relativamain miaivel cun paucas quantitads da naiv e cun paucs dis da naiv ha la via tranter Segl e Malögia stuì vegnir serrada unicamain ina giada la fin da schaner 2025 causa in eveniment da la natira. Las pussaivladads da la nova signalisaziun LED n'han pia anc betg pudì vegnir nizzegiadas cumplainamain. Las stagnaziuns dal traffic en l'Engiadin'Ota tranter Schlarigna e Silvaplauna èn d'attribuir a la surchargia dal traffic.

Fasa d'emprova cun mesiras per diriger il traffic
«Sche la via sto vegnir serrada l'enviern proxim, introducin nus en tscherts lieus, sco fasa d'emprova, mesiras per diriger il traffic, e nus extendain la signalisaziun LED existenta», ha declerà l'inschigner chantunal Reto Knuchel. Tar pliras rundellas vegnan ils vehichels che arrivan, lura sviads en in'autra direcziun u sin parcadis temporars. Qua tras duai vegnir impedì, ch'ils vehichels stettian salda sin via davant ina serrada e chaschunian lungas colonnas ed uschia ulteriurs impediments dal traffic. Quests impediments possian avair per consequenza, che schizunt las organisaziuns a glisch blaua, ils vehichels da rumir naiv ed ils bus da lingia na possian betg pli circular.

L'Uffizi da construcziun bassa ha localisà pussaivladads da parcar temporaras en il territori da Segl ed ha examinà lur potenzial d'utilisaziun. En quests lieus pon vehichels vegnir parcads per spetgar, fin che la via, ch'è per exempel vegnida serrada pervia da privel da lavinas, vegn puspè averta. Sche la mesira sa cumprova e sch'igl exista in ulteriur basegn, pudessan ulteriuras plazzas da parcar vegnir tratgas en consideraziun tranter San Murezzan Bogn e Segl.

Gieus olimpics en l'Italia dal Nord
Il favrer 2026 han lieu a Milaun/Cortina ils gieus olimpics d'enviern. Las concurrenzas da skis alpin e da freestyle èn a Livigno ed a Bormio. Il traffic da visitadras e visitaders vegn perquai ad esser da sentir er en il Grischun. Actualmain elavura ina gruppa da lavur in concept da traffic per ils gieus olimpics 2026. La gruppa da lavur è er en contact cun ils posts cumpetents da las regiuns vischinas en l'Italia dal Nord. La signalisaziun stradala LED, che vegn en funcziun da nov l'enviern 2025/26, duai perquai vegnir utilisada temporarmain per diriger il traffic da visitadras e visitaders da la Svizra e da l'Italia dal Nord.

Facit positiv dals discurs da lavuratori
Suenter ch'ins ha gì trais buns discurs da lavuratori, vul l'Uffizi da construcziun bassa involver er vinavant las represchentantas ed ils represchentants dals secturs turissem, economia, politica, fatgs da sanadad e traffic public en l'ulteriur svilup da la signalisaziun, da la communicaziun davart il stadi da las vias sco er da la gestiun dal traffic.

Fotografia agiuntada:

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 9.00 fin las 11.00), e‑mail Reto.Knuchel@tba.gr.ch
• Gion Hagmann, manader Servetschs tecnics, Uffizi da construcziun bassa, tel. +41 81 257 37 35, e‑mail Gion.Hagmann@tba.gr.ch

Responsabladad: Uffizi da construcziun bassa