La Regenza ha nominà Michael Domeisen sco nov manader da l'Uffizi per economia e turissem. El surpiglia questa funcziun il 1. da mars 2026.

Michael Domeisen è creschì si a Son Gagl ed ha absolvì in studi da geografia economica, biologia e scienzas politicas a l'Universitad da Berna. L'um da 49 onns ha experientschas da direcziun cumprovadas e vastas enconuschientschas al punct da contact tranter l'economia, l'administraziun e la politica. Plinavant ha el er rimnà durant blers onns savida en il svilup da l'economia locala.

Actualmain è Michael Domeisen engaschà sco mainagestiun da la HSG Foundation, Son Gagl. Avant ha el lavurà tranter auter sco directur dal «House of Winterthur». «House of Winterthur» promova l'economia locala e generala e fa reclama turistica per l'entira regiun da Winterthur. Plinavant è el stà manader da Partnerschaften Schweiz tar la ETH Foundation, Turitg.

Michael Domeisen daventa successur da Reto Bleisch che dat giu la direcziun da l'uffizi sin agen giavisch per motivs famigliars per ils 31 d'october 2025. Durant il temp transitoric vegn la direcziun da l'uffizi surpigliada dal vicemanader da l'uffizi.

L'Uffizi per economia e turissem (UET) è in post da servetsch dal Departament d'economia publica e fatgs socials (DES), che s'engascha – sco post da contact da l'economia – per interpresas existentas e novas en il Grischun. Il UET procura per cundiziuns generalas optimalas a favur da l'economia en il chantun Grischun.

Fotografia agiuntada:

Infurmaziuns:

President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 14.00 fin las 15.00), e‑mail Marcus.Caduff@dvs.gr.ch

Responsabladad: Regenza