La Regenza ha approvà in project per revitalisar la zona umida Cavril en la vischnanca da Bregaglia. La zona umida Cavril s'extenda sur ina lunghezza da var in kilometer per lung da l'aual Orlegna ed ha ina surfatscha da bundant nov hectaras. Actualmain vegn la surfatscha oriunda da la zona umida restrenschida lateralmain tras stabiliments da protecziun cunter aua gronda, tras la via d'access a la fracziun Cavril sco er tras ina deponia da material. En cumparegliaziun cun il stadi oriund d'avant ils onns 1950 vegnan qua tras influenzadas er grondas surfatschas da biotops prezius ch'èn tipics per zonas umidas e probablamain periclitada la biodiversitad.

La revitalisaziun prevesa da minimar ils deficits actuals areguard la dinamica en la zona umida e da schlargiar il perimeter central da la zona umida, per puspè dar a l'aual Orlegna il spazi necessari per in svilup autodinamic. Cun allontanar material vegnan engrondids ils secturs dinamics a la riva dretga e vegn promovida la dinamica a la riva sanestra sut la punt actuala. Il mosaic da biotops multifar cun bleras spezias e cun habitats ecologicamain prezius e tipics per zonas umidas po vegnir meglierà generalmain cun quest project. Mesiras da revalitaziun ecologicas cumplementaras augmentan supplementarmain la valur dal project e protegian valurs natiralas existentas en ils territoris da protecziun da la cuntrada e da la natira per lung da l'aual Orlegna. Per il project èn budgetads custs totals da var 1,89 milliuns francs. Quests custs vegnan finanziads cumplainamain sur il «naturemade star-Fonds Castasegna» da l'Ovra electrica da la citad da Turitg.

Maletg: stadi actual

La Regenza ha approvà il project «Rempar Val digl Uors (UCB)» e permess contribuziuns tenor la Lescha chantunala davart il guaud sco er tenor la cunvegna da program da la nova gulivaziun da finanzas (NGF) cun la Confederaziun en il sectur «Privels da la natira gravitativs tenor la Lescha dal guaud». Als custs budgetads da 400 000 francs ha ella concedì ina contribuziun chantunala da maximalmain 160 000 francs e disponì ina contribuziun federala da maximalmain 140 000 francs. Las lavurs principalas vegnan realisadas entaifer in onn da construcziun. Il project duai vegnir terminà l'onn 2026.

En la vischnanca da Farera, tranter Calantgil e Campsut suenter la Val digl Uors, traversa la via d'Avras in sectur da crudadas fitg activ, nua che crappa sa distatga regularmain da la paraid-crap. Suenter ch'igl ha dà l'onn 2021 ina pli gronda crudada da grippa, han ins allontanà l'onn 2022 parts da la costa fitg stippa dal grip. Dapi lura èn però capitads novs eveniments da crudadas ch'èn arrivadas fin giu sin via. En il rom dal project segirescha l'Uffizi da construcziun bassa dal Grischun il traject periclità cun agid da mesiras da protecziun architectonicas. Igl è previs da montar ina rait da protecziun cun cuntrafrancadas (770 meters quadrat) en l'areal da sbuvada. Uschia duai vegnir reducì cleramain il privel ch'exista anc adina, perquai che la costa dal grip è instabila.

 

Maletg 1: suenter ina crudada, maletg 2: situaziun durant l'enviern 2025

La revisiun totala da la Lescha chantunala davart la protecziun da datas (nLCPD), ch'il Cussegl grond ha concludì ils 10 da favrer 2025, vegn messa en vigur il 1. da schaner 2026. Il termin da referendum è scadì ils 20 da matg 2025. Entaifer quest termin n'èn vegnids inoltrads nagins referendums. Cun la revisiun totala exequescha il Grischun la revisiun totala da la Lescha federala davart la protecziun da datas sin plaun chantunal. Sin fundament dal progress tecnologic dals ultims 20 onns e da las prescripziuns dal dretg internaziunal ch'èn sa midadas, èsi stà necessari d'adattar il dretg davart la protecziun da datas.