Suenter la sanaziun da la stalla d'arments dal Stabiliment giudizial Realta ha gì lieu l'avertura uffiziala: Oz gievgia han la cussegliera guvernativa Carmelia Maissen ed il cusseglier guvernativ Peter Peyer prendì invista da la nova infrastructura moderna, ch'è da gronda impurtanza per il bain puril dal Stabiliment giudizial Realta. Sonda proxima, ils 20 da settember 2025, po la populaziun visitar la nova stalla renovada.

«Grazia als plazs da lavur moderns survegnan ils praschuniers ina gronda responsabladad professiunala e las collavuraturas ed ils collavuraturs dal Stabiliment giudizial Realta in ambient da lavur attractiv», ha ditg il cusseglier guvernativ Peter Peyer, schef dal Departament da giustia, segirezza e sanadad. La tegnida d'animals sco er il terren d'agricultura en il fund da la Tumleastga èn da gronda impurtanza per il bain puril dal Stabiliment giudizial Realta. Il manaschi proveda la butia dal bain puril ed ils dus stabiliments giudizials Cazas Tignez e Realta cun blers differents products da l'atgna tegnida d'animals e da la cultivaziun dad ers, da puma e da legums. «Il bain puril metta a disposiziun circa 50 plazs da lavur per persunas collocadas. Quai è da gronda impurtanza per lur resocialisaziun e pli tard per lur integraziun en la societad», ha explitgà il directur dal Stabiliment giudizial Realta, Padruot Salzgeber.

Ademplì autas pretensiuns envers il bainstar dals animals
«En il project da construcziun è il focus vegnì mess sin il bainstar dals animals e sin ina tegnida natirala dals animals. Igl è er stà impurtant da resguardar, ch'ils process da manaschi funcziunian bain per tut las persunas engaschadas sin il bain puril, e che las resursas da material da construcziun vegnian schanegiadas», ha ditg la cussegliera guvernativa Carmelia Maissen, scheffa dal Departament d'infrastructura, energia e mobilitad, en ses pled a chaschun da la surdada uffiziala da la clav a Cazas. La directura da construcziun ha gì plaschair da pudair visitar la stalla sanada.

La stalla è vegnida concepida uschia, ch'ils basegns dals animals vegnan respectads e ch'ils arments pon esser regularmain ora en il liber. Il posiziunament optimal da l'indriz da pavlar, l'integraziun dal ladimer sco er ils locals da tecnica e da persunal cumpletteschan il stabiliment puril. Sin il bain puril vegnan tegnids 300 animals.

Preparà per l'avegnir
La stalla era vegnida construida l'onn 1967. Suenter in'utilisaziun da stgars 60 onns è il basegn da sanar la stalla da muvel da latg e la stalla d'allevament stà considerabel, malgrà las adattaziuns fatgas durant ils onns 1990. La structura purtanta sco er ils foss da puschina avevan donns d'isada. E tar las boxas da giaschair sco er tar ils secturs da magliar vegnivan las prescripziuns actualas envers la sanadad d'animals ademplidas mo pli per part. «Cun la renovaziun han ins eliminà tut ils deficits. Il stabiliment correspunda ussa puspè a las pretensiuns d'ozendi ed è preparà fitg bain per l'avegnir», ha declerà l'architect chantunal Andreas Kohne. Las lavurs da renovaziun e d'engrondiment dals edifizis da stalla dal stabiliment giudizial èn vegnidas planisadas e realisadas en etappas. L'avertura signifitga la fin da questas lavurs. L'onn 2018 è vegnida sanada la stalla d'allevament d'arments da maz. Gia l'onn 2016 era vegnida construida ina stalla d'allevament da portgs cun ina cuschina per preparar pavel.

Per gronda part interpresas regiunalas
Planisà e realisà il project ha il team da planisaders generals maurusfrei Architekten da Cuira ensemen cun Hartmann Architekten SA da Küblis. Las lavurs da construcziun, che han durà circa 18 mais, èn vegnidas surdadas principalmain ad interpresas regiunalas. Ils custs da l'entir project sa movan en il rom dal credit dad 8,5 milliuns francs. Quest credit è vegnì approvà dal Cussegl grond en la sessiun da zercladur 2023.

Fotografias agiuntadas:

Foto 2 / Foto 3 / Foto 4 / Foto 5 / Foto 6

Fotos © Mathias Kunfermann, Tusaun

Agiunta:

Fegl d'infurmaziun (DE)

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 89 71, e‑mail medienstelle@djsg.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 11.00 fin las 12.00), e‑mail Andreas.Kohne@hba.gr.ch
• Padruot Salzgeber, directur dal Stabiliment giudizial Realta, tel. +41 81 257 46 00 (cuntanschibel da las 13.30 fin las 14.30), e‑mail Padrout.Salzgeber@ajv.gr.ch

Responsabladad: Uffizi da construcziun auta

Di da la stalla averta en il Stabiliment giudizial Realta

Sonda, ils 20 da settember 2025, ha la populaziun l'occasiun da visitar il manaschi da la stalla d'arments sanada en il Stabiliment giudizial Realta. Da las 10.00 fin las 16.00 avra il stabiliment giudizial las portas da la stalla e sa legra da numerusas visitadras e numerus visitaders. Il manaschi po vegnir visità individualmain sin in gir signalisà. Ultra da quai han las visitadras ed ils visitaders differentas pussaivladads d'alimentaziun al lieu. Il bain è cuntanschibel cun il traffic public e cun l'auto. Plazzas da parcar èn avant maun.