Cun la decleraziun da participaziun a la quarta ediziun repassada da la Charta da la statistica publica da la Svizra dat la Regenza grischuna in cler signal per ina producziun da statisticas independentas e d'auta qualitad en il chantun Grischun.

La Charta è in codex da conduita d'etica professiunala, ch'è vegnì elavurà e dacurt actualisà da la Conferenza dals uffizis regiunals da statistica da la Svizra (CORSTAT) ensemen cun il Cussegl etic da la statistica publica da la Svizra e cun l'Uffizi federal da statistica (UST). La Charta è il document da referenza per l'activitad dals servetschs da statistica e dals posts da servetsch ch'elavuran statisticas, e quai sin tut ils plauns statals instituziunals da la Svizra. Il document gida a garantir en moda duraivla la qualitad e definescha a maun da princips tschernids las basas, las prescripziuns da l'etica professiunala ed il rom da qualitad per la lavur dals servetschs da statistica.

La finamira da la Charta repassada èsi da mantegnair la confidenza e la credibladad da la statistica publica ed a medem temp da tegnair quint da las pretensiuns creschentas d'in mund che vegn dominà da datas. Ultra da quai promova la Charta la transparenza sco er l'independenza da la statistica envers gruppas d'interess. Er protegia ella cunter influenzas politicas. Quai èn duas premissas essenzialas, per che l'opiniun possia vegnir furmada sin basa dals fatgs ed en moda independenta en il process da la democrazia directa.

Infurmaziuns: Departament d'economia publica e fatgs socials

La Regenza ha approvà il project «Rempar Sand (UCB)» e permess ina contribuziun tenor la cunvegna da program da la nova gulivaziun da finanzas (NGF) cun la Confederaziun en il sectur «Privels da la natira gravitativs Guaud». Als custs budgetads da 641 000 francs ha ella concedì ina contribuziun chantunala da maximalmain 256 400 francs e disponì ina contribuziun federala da maximalmain 224 350 francs. Las lavurs principalas vegnan realisadas entaifer in onn da construcziun. Il project duai vegnir terminà l'onn 2026.

Il project sa chatta sin il territori communal da la citad da Cuira, tranter l'ovra electrica Sand e la fermada da bus Sassal. La lingia da la Viafier retica sco er la via da Meiersboden mainan qua sin in traject stretg tranter paraids-crap e spundas stippas da la vart da la muntogna e la Plessur da la vart da la val. La via da Meiersboden na correspunda betg a las pretensiuns che valan per il profil traversal regular da vias da colliaziun e duai perquai vegnir schlargiada ils proxims onns a dus vials fin a la punt Sassal che traversa la Plessur. Il schlargiament previs tanghescha ina palissada da lain da la vart da la muntogna, che impedescha che material crodia giu sin via. Il traject da via sa chatta er sut paraids-crap main exponidas. Da questas paraids-crap èn resultadas gia en il passà crudadas pli grondas ch'èn arrivadas fin giu sin via. En il rom dal project èsi planisà da montar en il nordvest ina rait da protecziun cunter crudadas da crappa d'ina lunghezza da 45 meters e d'ina autezza da 3 meters. Ultra da quai vegn construì in rempar da protecziun ch'è circa 50 meters lung ed 1,5 meters aut. Per stabilisar la spunda vegn montada ina rait da protecziun cun cuntrafrancadas d'ina surfatscha da var 350 meters quadrat.

© InfraGeo AG

Infurmaziuns: Departament d'infrastructura, energia e mobilitad

La Regenza ha approvà las «Mesiras immediatas rempar Mulin da Marugg (UCB)» ch'èn gia vegnidas realisadas en la vischnanca da Scuol. Per quest project ha ella permess ina contribuziun tenor la cunvegna da program da la nova gulivaziun da finanzas (NGF) cun la Confederaziun en il sectur «Privels da la natira gravitativs Guaud». Als custs calculads cun 250 000 francs ha ella concedì ina contribuziun chantunala da maximalmain 100 000 francs e disponì ina contribuziun federala da maximalmain 87 500 francs.

Il mars 2024 hai dà ina sbuvada spontana da la vart dretga da la Val Tasna, sur la via d'Engiadina. Il material distatgà è sa fermà temporarmain sur la via. Pervia da fermas precipitaziuns è el però puspè sa mess en moviment paucas emnas pli tard, l'avrigl 2024, ed ha cuvert il vial da la via d'Engiadina da la vart da la muntogna. Suenter la rumida hai dà ulteriuras sbuvadas pli pitschnas. Cuntinuadamain han ins stuì allontanar il material ch'è adina puspè arrivà giu sin via e che ha periclità las participantas ed ils participants dal traffic. Per evitar ulteriurs donns èsi stà necessari da prender mesiras immediatas. Per mitigiar il privel è vegnida construida ina barriera da protecziun cunter crudadas da crappa d'ina autezza da 3 meters e d'ina lunghezza da 35 meters. Sco protecziun cunter ulteriuras crudadas e cunter l'erosiun è il material da sbuvada restant ch'era s'accumulà sin la surfatscha da sbuvada libra, vegnì allontanà fin ad ina pendenza natirala da la spunda. Sin la nova surfatscha sbluttada è vegnì construì in simpel rempar cun traversas.

Infurmaziuns: Departament d'infrastructura, energia e mobilitad

La Regenza ha approvà las «Mesiras immediatas per segirar la sbuvada da la spunda a Rania (UCB)» ch'èn gia vegnidas realisadas en la vischnanca da Ziràn-Reschen. Per quest project ha ella permess ina contribuziun tenor la cunvegna da program da la nova gulivaziun da finanzas (NGF) cun la Confederaziun en il sectur «Privels da la natira gravitativs Guaud». Als custs calculads cun 723 000 francs ha ella concedì ina contribuziun chantunala da maximalmain 289 200 francs e disponì ina contribuziun federala da maximalmain 253 050 francs.

Tranter la Viamala e Rania maina la Via taliana H13 sur lungs trajects tras ina chavorgia stretga, per lung da spundas stippas ch'èn cuvertas da guaud. Questas spundas cuntegnan strivlas da grippa ch'èn exponidas a l'erosiun permanenta e che chaschunan adina puspè crudadas da crappa e da blocca sco er sbuvadas che arrivan fin giu sin via. Da la spunda stippa da la vart sanestra da la via naziunala A13, circa 200 meters al sid da la gronda punt da la Viamala, è sa distatgada il december 2023 ina sbuvada spontana d'ina ladezza da 25 meters. Malgrà che la gronda part da la massa glischnanta è sa fermada sin la champagna, han terratsch e crappa cuvert la via chantunala sin ina lunghezza da circa 10meters. Per evitar ulteriurs donns èsi stà necessari da prender mesiras immediatas. Per segirar l'areal da la spunda pertutgada han ins stuì allontanar tranter auter l'entira massa glischnanta da var 1500 meters cubics. Uschia han ins pudì distgargiar e puspè stabilisar la scarpa da la via da la vart da la muntogna. Per impedir l'erosiun e novas sbuvadas èn plinavant vegnidas montadas barrieras da lain cun cuntrafrancadas sco er bists da plantas traversals. Cun la realisaziun da quest project èsi stà pussaivel da reducir marcantamain ils privels resultads en consequenza da la sbuvada da la spunda e da restabilir il nivel da segirezza oriund.

Il chantun Grischun ha extendì ses program da promoziun per giuvnas medias e giuvens medis da chasa. Tras ina cunvegna da prestaziun da l'Ospital chantunal dal Grischun en collavuraziun cun praticas da medias e medis da chasa vegnan messas a disposiziun per ils onns 2025 fin 2028 mintg'onn diesch plazzas da scolaziun a temp cumplain: otg plazzas da praticum da mintgamai 6 mais per la medischina generala e duas plazzas da praticum da mintgamai 6 mais per la pediatria. Il curriculum da furmaziun supplementara per medias e medis da chasa sa drizza a medias e medis d'assistenza che vulan obtegnair la spezialisaziun «medischina interna generala», per ch'ellas ed els possian silsuenter lavurar sco provedidras e provediders da basa en il chantun Grischun. Pervia da la gronda dumonda èsi stà pussaivel da dublegiar il dumber da plazzas da scolaziun dapi l'onn 2022.

Infurmaziuns: Departament da giustia, segirezza e sanadad