A partir da l'onn da gestiun 2026 surpiglia la KPMG SA il mandat dal post da revisiun extern da la Banca chantunala grischuna (BCG). La decisiun da la Regenza grischuna è vegnida prendida suenter ina procedura da publicaziun e da selecziun dal cussegl da banca.

Dapi l'onn da gestiun 2008 lavura la societad d'audit Ernst & Young SA (EY) sco post da revisiun extern per la BCG. Er sch'i n'exista nagina obligaziun da limitar la durada dal mandat, èsi usità en il senn d'ina «best practice of corporate governance» da prender en consideraziun periodicamain ina midada da la societad d'audit.

Per sia elecziun è cumpetenta la Regenza grischuna tenor l'incumbensa legala. Pervia da la durada da mandat dad EY da blers onns, ha ella decidì da publitgar da nov il post da revisiun extern. Il mandat cumpiglia la gruppa da finanzas BCG incl. las participaziuns da maioritad a la Albin Kistler SA, a la BZ Bank Aktiengesellschaft ed a la banca privata Bellerive SA.

A partir da l'onn da gestiun 2026 surdat la Regenza grischuna da nov a la KPMG SA il mandat sco societad d'audit tenor il dretg da surveglianza e sco post da revisiun dal dretg d'aczias da la gruppa da finanzas BCG. La KPMG reveda gia autras bancas chantunalas ed instituts da finanzas svizzers da renum. L'interpresa ha uschia ina vasta savida professiunala en quests conturns specifics ed ademplescha las autas pretensiuns da transparenza, d'independenza e da qualitad da controlla. L'elecziun ha lieu cun resalva da la conferma da l'Autoritad federala per la surveglianza dals martgads da finanzas FINMA.

L'elecziun dal nov post da revisiun è ina part da la survista generala davart la BCG che la Regenza ha concludì l'onn 2024. Ella suonda il rapport da ristga e da responsabladad, dal qual la Regenza ha prendì enconuschientscha il zercladur 2025.

Infurmaziuns:

Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 12.00 fin las 13.00), e‑mail Martin.Buehler@dfg.gr.ch

Responsabladad: Regenza