Fotografias, films, tuns e videos furman nossa memoria collectiva ed ans laschan experimentar l'istorgia en moda directa ed emoziunala. Per quest motiv gida il chantun Grischun dapi onns activamain a mantegnair sia ritga memoria audiovisuala ed a render accessibla tala a la publicitad. Da nov vegn quest patrimoni cultural integrà en l'inventari naziunal da survista da Memoriav.

Il chantun Grischun s'engascha dapi onns a favur dal mantegniment e da l'intermediaziun da ses patrimoni cultural multifar. Cun Porta Cultura, il portal da medias audiovisualas dal Grischun, ils catalogs da l'Archiv dal stadi e da la Biblioteca chantunala sco er la lavur da la Fundaziun da fotografias dal Grischun e da las plattafurmas nossaistorgia ed iSTORIA existan gia instruments impurtants che cataloghiseschan ils bains culturals audiovisuals.

Ussa sa participescha il Grischun a l'inventari naziunal da survista da Memoriav, il post spezialisà per il patrimoni audiovisual da la Svizra. La finamira dal project è quella da registrar effectivs audiovisuals en tut la Svizra, da documentar lur stadi da mantegniment e da pussibilitar uschia mesiras sistematicas per segirar quests effectivs. En il Grischun vegn l'enquista coordinada da l'Uffizi da cultura, en collavuraziun cun la Biblioteca chantunala dal Grischun e cun Porta Cultura. Ultra da collecziuns enconuschentas duain er vegnir registrads effectivs che n'eran fin ussa strusch visibels, per exempel d'uniuns, d'instituziuns u da chasadas privatas.

Appel da sa participar
A partir da l'october 2025 pon instituziuns, organisaziuns e persunas privatas sa participar cun far in'enquista online. Tschertgadas vegnan infurmaziuns davart films, videos, documents sonors u fotografias ch'èn avant maun – i na sa tracta betg da consegnar las materialias, mabain da far indizis davart lur existenza, deposit e stadi. In «scout» incumbensà spezialmain vegn ad accumpagnar l'enquista e stat a disposiziun sco persuna da contact per dumondas. Las datas registradas ed ils resultats vegnan integrads en in rapport da project ch'è accessibel al public. Supplementarmain vegnan ad avair lieu a Cuira, Poschiavo, Glion, Zernez ed online occurrenzas che infurmeschan davart il project e che mussan, co che medias audiovisualas pon vegnir magasinadas e protegidas cunter donns.

Il Grischun envida instituziuns, organisaziuns e persunas privatas da sa participar a l'enquista e da prestar uschia cuminaivlamain ina contribuziun per segirar il patrimoni audiovisual dal chantun.

Dapli infurmaziuns:

Infurmaziuns davart il project Memoriav «Inventaris da survista»

Infurmaziuns:

• Sarah Amsler, manadra da project, Uffizi da cultura, tel. +41 81 257 89 10 (cuntanschibla da las 10.00 fin las 11.00), e‑mail Sarah.Amsler@afk.gr.ch

• Cécile Vilas, directura Memoriav e manadra da project per l'entira Svizra, e‑mail Cecile.Vilas@memoriav.ch

Responsabladad: Uffizi da cultura