Il facit da la chatscha auta grischuna 2025 è positiv. Malgrà ch'igl ha populaziuns da tschiervs pli pitschnas èn differentas regiuns, è la preda stada buna. Er il dumber da chavriels sajettads sa chatta en la media da plirs onns. Unicamain il dumber da chamutschs sajettads è levamain sut la media. Per ademplir ils plans chantunals pretensius da prelevaziun da tschiervs e da chavriels ha la chatscha speziala lieu il november ed il december en tut las regiuns.
Malgrà l'aura variabla e malgrà la reducziun dal dumber da tschiervs han las chatschadras ed ils chatschaders fatg ina buna preda da chatscha auta. Vegnids sajettads èn 3432 tschiervs e 2502 chavriels. Quai è levamain sur la media dals ultims 20 onns. Sumegliantamain a l'onn precedent è il resultat final da la chatscha da chamutschs, cun 2863 animals sajettads, levamain sut la media. En la Mesolcina han ins sajettà 23 portgs selvadis ed en il Puschlav 1 portg selvadi.
Resultats da l'emprima part da la chatscha grischuna 2025:
La chatscha speziala è impurtanta
La chatscha dal november e dal december è impurtanta per ademplir ils plans da prelevaziun d'animals feminins e per adattar il dumber da tschiervs e da chavriels als quartiers d'enviern. Impurtant è quai er per mantegnair a lunga vista guauds da protecziun sauns e bain structurads. Per ademplir ils plans da prelevaziun sco er l'incumbensa da chatscha vegn la chatscha speziala 2025 permessa per 1711 vatgas-tschierv e lur vadels, per 281 chavriels ed, entaifer quatter territoris problematics pertutgant il guaud e la selvaschina, per 10 chamutschs. Tar ils tschiervs è il plan da chatscha speziala 2025 cleramain pli bass che l'onn avant. Quai è d'ina vart d'attribuir a la buna preda da chatscha auta – da l'autra vart al fatg che las populaziuns èn sa reducidas dapi l'onn 2020, uschia ch'er ils plans da prelevaziun generals èn pli bass. Durant la chatscha auta èn vegnids sajettads cleramain dapli bucs-chavriel che chauras-chavriel. Perquai è il plan da chatscha speziala pli aut che l'onn 2024. Sco ils onns precedents vegn la chatscha speziala sin portgs selvadis permessa senza limitaziun dal dumber, perquai che lur populaziuns creschan e perquai che quests animals fan pli e pli gronds donns en l'agricultura.
Ina lavur pretensiusa spetga
La chatscha speziala dal november e dal december è ina gronda sfida. En bleras regiuns fan las chatschadras ed ils chatschaders gronds sforzs per persequitar vinavant las finamiras dal svilup da las populaziuns, ch'èn vegnidas definidas en il rom da la strategia da la Regenza «Spazi da viver guaud-selvaschina 2021». En vista al fatg che las populaziuns èn en blers lieus gia pli pitschnas, daventa questa incumbensa adina pli difficila. L'incumbensa duai vegnir ademplida cun grond respect envers la selvaschina ed envers la natira. Igl è impurtant che la lavur da las chatschadras e dals chatschaders vegnia sustegnida da tut las persunas participadas, en spezial er da las proprietarias e dals proprietaris da guaud.
Agiuntas:
Infurmaziuns:
- Lukas Walser, manader da la partiziun Selvaschina e chatscha, Uffizi da chatscha e pestga, tel. +41 81 257 38 92 (cuntanschibel da las 10.30 fin las 11.30), e‑mail Lukas.Walser@ajf.gr.ch
- Urban Maissen, selvicultur chantunal, Uffizi da guaud e privels da la natira, e‑mail Urban.Maissen@awn.gr.ch
Responsabladad: Uffizi da chatscha e pestga