La Cuminanza da lavur da las regiuns alpinas (ARGE ALP) vul sa colliar meglier en il sectur dal management dals animals da rapina gronds e promover cuminaivlamain strategias politicas per rinforzar la generaziun giuvna da muntogna. Quai ha concludì la 56. Conferenza da las scheffas e dals schefs da las regenzas cun duas resoluziuns. Plinavant ha la ARGE ALP surdà a chaschun da la conferenza il premi da la ARGE ALP davart il tema «La generaziun giuvna da muntogna: viver, lavurar e gudagnar en las Alps». In project innovativ dal Grischun ha pudì persvader la giuria internaziunala.
La 56. Conferenza da las scheffas e dals schefs da las regenzas da la ARGE ALP a Trient è stada oz avantmezdi il punct culminant e la finiziun da l'onn presidial da la provinza autonoma Trento. Il guvernatur Maurizio Fugatti ha surdà il presidi al stadi federativ Salzburg.
Commembers da la ARGE ALP concludan duas resoluziuns
Tras la deliberaziun da duas resoluziuns a chaschun da la Conferenza da las scheffas e dals schefs da las regenzas han ils 10 commembers da la ARGE ALP rinforzà lur collavuraziun transcunfinala. Il management dals animals da rapina gronds è in tema actual e transcunfinal che pertutga tut las regiuns da la ARGE ALP en differenta moda. En ina resoluziun cuminaivla èn ils commembers s'occupads da quest tema. La cuminanza da lavur persequitescha la finamira prioritara da garantir activitads economicas, l'agricultura da muntogna e la segirezza publica – en concordanza cun las relaziuns territorialas, cun la protecziun da la biodiversitad alpina e cun las prescripziuns giuridicas naziunalas e regiunalas respectivas.
Cun ina segunda resoluziun rinforzan ils commembers da la ARGE ALP lur stentas cuminaivlas en il sectur da la generaziun giuvna da muntogna. Mo sche persunas giuvnas sa fan valair e gidan a concepir activamain ils process, èsi pussaivel da promover ina visiun cuminaivla per l'avegnir dal territori alpin. La finamira è quella da rinforzar la rolla strategica da las regiuns da la ARGE ALP sin plaun local ed internaziunal en las strategias politicas per il svilup regiunal, quai per dumagnar las sfidas actualas cun soluziuns innovativas. Igl è previs da discutar ina retscha da mesiras che fan effect sin differents plauns e che nizzegian er novas tecnologias.
Premià project innovativ dal Grischun
A chaschun da ses onn presidial ha la provinza autonoma Trento surdà in premi da la ARGE ALP davart il tema «La generaziun giuvna da muntogna: viver, lavurar e gudagnar en las Alps». Vegnids surdads èn premis en las categorias «interpresas e start-ups» sco er «scolas». Suenter in'emprima valitaziun tras ina giuria regiunala èn ils megliers projects vegnids suttamess ad ina giuria internaziunala. Questa giuria d'expertas ed experts da tut las regiuns alpinas ha fatg la valitaziun finala.
In project innovativ dal Grischun ha pudì persvader la giuria internaziunala. En la categoria «interpresas e start-ups» ha il project «CSH-Kreislaufkette» dals iniziants Jonas Macullo e Toni Cappelli fatg la segunda plazza. Il project ha la finamira da transfurmar ruments da guaud e da plantas en resursas persistentas.
Dapli infurmaziuns stattan a disposiziun sut www.argealp.org.
Fotografias agiuntadas:
Las scheffas ed ils schefs da las regenzas da la cuminanza da lavur da las regiuns alpinas (ARGE ALP) © Provinza autonoma Trento
Ils victurs dal premi da la ARGE ALP, categoria «projects gronds»: (da sanestra) Victurs dal premi da la ARGE ALP Jonas Macullo e Toni Cappelli e Cusseglier guvernativ Martin Bühler, © Provinza autonoma Trento
Infurmaziuns davart la 56. Conferenza da las scheffas e dals schefs da las regenzas:
Cusseglier guvernativ Martin Bühler, schef dal Departament da finanzas e vischnancas, e‑mail Martin.Buehler@dfg.gr.ch
Infurmaziuns davart il premi da la ARGE ALP:
Responsabladad: Regenza