La Cumissiun per ambient, traffic ed energia (CATE) recumonda unanimamain al Cussegl grond d'approvar il credit d'impegn brut da 50 milliuns francs che la Regenza aveva proponì a favur dal project per la dischlocaziun parziala da Brinzauls.

Sut il presidi dal vicepresident da la cumissiun Giovanni Jochum ed en preschientscha da la cussegliera guvernativa Carmelia Maissen, scheffa dal Departament d'infrastructura, energia e mobilitad, ha la CATE predeliberà la missiva da la Regenza tar il credit d'impegn per il project da dischlocar parzialmain Brinzauls. En quest connex dumonda la Regenza il Cussegl grond d'approvar in credit d'impegn da 50 milliuns francs (communicaziun da la Regenza). Uschia duai il chantun conceder a la vischnanca d'Alvra ina contribuziun d'investiziun per realisar il project per la dischlocaziun preventiva.

La situaziun da ristga cuntinuanta e l'evacuaziun che dura gia bunamain in onn, fan gronds quitads a la populaziun da Brinzauls. La cumissiun predeliberanta è da l'avis ch'il project per la dischlocaziun parziala saja ina pussaivladad cunvegnenta ed adequata per distgargiar las abitantas ed ils abitants che vulan dischlocar. Perquai è ella entrada unanimamain en la fatschenta e propona – er unanimamain – al Cussegl grond d'approvar il credit d'impegn da 50 milliuns francs.

Il Cussegl grond vegn a tractar questa fatschenta en la sessiun da december 2025.

Infurmaziuns:

Giovanni Jochum, vicepresident da la Cumissiun per ambient, traffic ed energia, tel. +41 79 222 04 34 (cuntanschibel da las 14.00 fin las 16.00), e‑mail gio.jochum@gmail.com

Responsabladad: Cussegl grond / Cumissiun per ambient, traffic ed energia