Mez october ha il Cussegl federal approvà trais adattaziuns dal Plan directiv chantunal. I sa tracta dal project da la dischlocaziun da Brinzauls, dal project dal sviament da Sta. Maria sco er dal Plan directiv chantunal Energia.
Questas adattaziuns dal plan directiv èn vegnidas concludidas da la Regenza e lura suttamessas il zercladur al Cussegl federal per l'approvaziun. Ils conclus dal Cussegl federal pon er vegnir consultads en il Fegl uffizial federal.
Dischlocaziun da Brinzauls
Tras l'approvaziun dal chapitel dal plan directiv «Dischlocaziun da Brinzauls» ha il Cussegl federal confermà las cundiziuns generalas per la planisaziun locala en il plan directiv. En il conclus d'approvaziun pretenda il Cussegl federal, ch'ils interess federals areguard ils prads sitgs e las surfatschas da guaud vegnian resguardads en la planisaziun locala posteriura da la vischnanca. Quests interess èn gia resguardads commensuradamain en il project da la vischnanca d'Alvra concernent la revisiun parziala «Vazerol». Ils plans da la vischnanca pertutgant las zonas da construcziun supplementaras ch'èn necessarias per la dischlocaziun, èn gia stads exponids publicamain; sco proxim pass suonda la votaziun dal pievel da la vischnanca d'Alvra.
Sviament da Sta. Maria
Ussa, che la Confederaziun ha approvà l'adattaziun dal plan directiv, è sclerida la dumonda impurtanta davart la coordinaziun territoriala per il sviament da Sta. Maria. Sco proxim pass instradescha l'Uffizi da construcziun bassa la procuraziun da las datas da basa. Questa lavur cumpiglia tranter auter ulteriurs scleriments geologics sco er in studi da variantas per optimar il trassé e per integrar meglier ils lieus dals portals dal tunnel en la cuntrada, per uschia reducir ad ina dimensiun acceptabla las consequenzas per l'object ISOS (lieu d'impurtanza naziunala degn da protecziun). Per il mument n'èsi anc betg pussaivel da dir, cura che las lavurs da construcziun cumenzan. Ina giada che las lavurs han cumenzà, dura la realisaziun dal tunnel previsiblamain 6 fin 7 onns.
Plan directiv chantunal Energia
En l'approvaziun dal Plan directiv Energia (PDChant-E) supplitgescha il Cussegl federal il chantun Grischun da resguardar tscherts temas e novas infurmaziuns da basa en connex cun la planisaziun d'ulteriurs projects concrets. En connex cun la planisaziun d'implants d'energia da vent per exempel, saja en tscherts territoris da resguardar la segirezza dal traffic aviatic sco er futuras rutas per sgols d'arriv da helicopters. Plinavant supplitgescha il Cussegl federal il chantun da determinar proximamain en il Plan directiv chantunal zonas adattadas per implants solars libers d'interess naziunal, e quai er per l'entir territori chantunal. Quai è ina nova incumbensa ch'è resultada da la revisiun da la Lescha d'energia.
Fotografias agiuntadas:
Foto © gartmann.biz
Sviament da Sta. Maria, varianta nord
Infurmaziuns:
- Dumondas davart las approvaziuns dal plan directiv:
Richard Atzmüller, manader da l'Uffizi per il svilup dal territori, tel. +41 81 257 23 21 (cuntanschibel da las 11.00 fin las 12.00), e‑mail Richard.Atzmueller@are.gr.ch
- Dumondas davart l'ulteriur proceder pertutgant il sviament da Sta. Maria:
Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 11.00 fin las 12.00), e‑mail Reto.Knuchel@tba.gr.ch
Responsabladad: Uffizi per il svilup dal territori / Uffizi da construcziun bassa