A partir d'immediat pon las persunas ch'emprendan d'ir cun auto en il chantun Grischun chargiar cumadaivlamain lur permiss per emprender a manischar sin il smartphone. Il permiss electronic per emprender a manischar (eLFA) vegn lura arcunà en il wallet dal smartphone.

Il permiss electronic per emprender a manischar (eLFA) è la varianta digitala dal permiss sin palpiri. Grazia al nov servetsch facultativ èsi anc pli simpel d'avair da tut temp per mauns il permiss. Persunas ch'emprendan d'ir cun auto pon retrair il eLFA sur l'app «swiyu» da la Confederaziun. L'app pon ins chargiar giu gratuitamain en l'App Store e tar Google Play. Persunas che han dumagnà l'examen da teoria, survegnan in SMS da l'Uffizi per il traffic sin via dal Grischun cun in link d'access persunal. Sur quest link pon ellas chargiar il eLFA directamain en il wallet da l'agen smartphone. Il permiss digital per emprender a manischar è gratuit e vala en tut la Svizra sco cumprova uffiziala da l'autorisaziun da manischar. Tgi che ha gia in permiss per emprender a manischar sin palpiri, po retrair supplementarmain il eLFA en moda cumadaivla sur l'internet.

Er la fotografia da la fatscha vegn registrada digitalmain
Dapi il settember pon las clientas ed ils clients chargiar si la fotografia da la fatscha, che vegn duvrada per in nov permiss da manischar, cun lur smartphone – saja quai en cas d'ina midada da num ubain sch'il permiss da manischar è ì a perder u è donnegià. Mo tgi che dumonda per l'emprima giada in permiss per emprender a manischar, sto sa preschentar persunalmain tar l'Uffizi per il traffic sin via per laschar controllar l'identitad. Er en quest cas po la fotografia da la fatscha vegnir fatga directamain cun l'agen smartphone.

Infurmaziuns:

Richard Peretti, vicemanader da l'Uffizi per il traffic sin via, tel. +41 81 257 80 10, e‑mail Richard.Peretti@stva.gr.ch

Responsabladad: Uffizi per il traffic sin via