La Regenza ha concedì a la Energia Solara Engiadinaisa SA (en fundaziun), sut tschertas cundiziuns, la permissiun per construir in implant fotovoltaic grond alpin en la vischnanca da Samedan. La Energia Solara Engiadinaisa SA consista da las fundaturas TNC Consulting SA, Energia Samedan, Alpiq SA ed IWB Energie Schweiz SA. La vischnanca da Samedan aveva approvà il project ils 13 da fanadur 2023. Durant la procedura da permissiun han las petentas dumandà pliras giadas ina prolungaziun dal termin per schliar protestas.

Il project prevesa da construir in implant fotovoltaic grond alpin en il territori tranter la plazza aviatica Samedan e l'Ova da Flaz. Il lieu è situà sin 1700 meters sur mar en proxima vischinanza dal stabiliment d'infrastructura grond gia existent da la plazza aviatica regiunala Samedan. Sin ina surfatscha da circa 21 hectaras duain vegnir installads var 26 800 moduls solars. La prestaziun totala da l'implant importa circa 14,5 megawatts-peak. Planisadas èn ina producziun annuala da circa 18,8 uras gigawatt sco er ina producziun da 615 kilowatts-peak durant il mez onn d'enviern. Ils moduls solars vegnan installads verticalmain cun in angul d'inclinaziun da 90 grads per cuntanscher ina producziun d'electricitad maximala, cunzunt durant ils mais d'enviern. La distanza tranter ils singuls moduls è 6,5 meters, quai che permetta da duvrar la surfatscha er vinavant per l'agricultura. Igl è previs da construir l'implant en duas etappas, ina duai esser terminada la fin dal 2027, l'autra il 2028. En ils secturs sensibels da l'implant vegni per gronda part desistì da construir fundaments da betun. Empè da quai vegnan realisadas soluziuns stabilas e reversiblas. Supplementarmain vegn construì in edifizi tecnic al sid da l'implant, che cuntegna alternaturs e transfurmaturs. Sur duas staziuns da transfurmaziun vegn l'electricitad furnida a la rait electrica existenta. Il chanal da cabels per la colliaziun cun la rait vegn construì a maun da perfuraziuns cun derschentada sut la pista da la plazza aviatica, quai per betg disturbar il manaschi aviatic.

© Energia Solara Engiadinaisa SA

Infurmaziuns: Departament d'economia publica e fatgs socials

La Regenza ha prendì posiziun tar in project da consultaziun da la Cumissiun per economia e taxas dal Cussegl dals chantuns, che vul flexibilisar las uras d'avertura da las butias. L'iniziativa dals chantuns «Flexibilisaziun temporara da las uras d'avertura da las butias» prevesa ina midada da la Lescha da lavur, che permetta als chantuns da designar da nov fin 12 dumengias per onn. Durant questas dumengias duain las butias pudair occupar persunal, senza ch'ellas dovran ina permissiun per quai. Fin ussa era quai pussaivel durant quatter dumengias per onn.

La Regenza sustegna il project. En sia posiziun menziunescha ella, ch'en ils territoris turistics dal chantun saja la lavur da dumengia durant la stagiun auta gia realitad, quai en il rom da las disposiziuns spezialas da la Lescha da lavur. Plinavant accentuescha ella, ch'i dettia gia in grond dumber d'excepziuns per fitg blers manaschis en differents lieus. Ord vista da la Regenza è l'augment moderà dal dumber da dumengias, durant las qualas lavurantas e lavurants dastgan vegnir occupads, perquai per tuts confurm al temp e commensurà.

Consultaziun dal Parlament federal

Infurmaziuns: Departament d'economia publica e fatgs socials