L'october 2025 ha l'Uffizi da construcziun bassa avert la nova punt dal Lochlitobel a S. Martin si Sursaissa. La construcziun moderna da lain da pign indigen persvada cun sia persistenza e cun sia capacitad. Ils custs importan var 2 milliuns francs.

La veglia punt dal Lochlitobel era donnegiada. Cun ina ladezza charrabla da mo 3 meters e cun ina capacitad da chargia insuffizienta na correspundeva ella betg pli a las pretensiuns dad oz. Durant l'enviern n'eri per exempel betg pussaivel da rumir la punt cun ils vehichels dal servetsch d'enviern usitads d'ozendi. In rinforzament da la punt na fiss betg stà economic. La soluziun è stada da construir ina punt dal tuttafatg nova.

Curt temp da construcziun e transport spectacular
Per la durada dal temp da construcziun n'èsi betg stà pussaivel da construir ina punt auxiliara, e pussaivladads da sviar confortablas n'eran strusch avant maun. Per limitar uschè bain sco pussaivel las restricziuns per il traffic, èn ils dus purtaders da lain, che paisan mintgamai 25 tonnas e ch'èn passa 27 meters lungs, vegnids prefabritgads e la finala installads al lieu sin il millimeter. Quest proceder ha procurà per auta qualitad ed ha gì l'effect che la via è stada serrada mo 8 emnas davent da la demoliziun da la punt veglia fin a l'avertura da la punt nova. Il transport spectacular dals purtaders da lain prefabritgads sin las vias stretgas da la Surselva è stà ina sfida speziala.

Nagins cumpromiss tar la capacitad
La nova punt ha ina lunghezza da 26,3 meters ed ina ladezza da 4,7 meters – quai è avunda, per che er vehichels pli lads possian traversar la punt senza problems en il futur. Ella è la pli gronda punt da ses gener sin la rait da vias chantunalas. Grazia a la construcziun cumbinada da lain e da betun è la punt dal Lochlitobel er stabila avunda per transports grevs. La punt ademplescha il model da la chargia da traffic senza reducziuns tenor SIA 261. Ella represchenta ina moda da construcziun duraivla, robusta ed a medem temp persistenta, che resista ils proxims decennis.

Fotografias agiuntadas:

1. La nova punt dal Lochlitobel a Sursaissa.

2. Montascha dals purtaders da lain al lieu. © STRABAG SA

3. Vista detagliada dals purtaders da pign, che consistan da lamellas d'ina ladezza da 22 cm.

Infurmaziuns:

Matthias Wielatt, schef Construcziuns artifizialas, Uffizi da construcziun bassa, tel. +41 81 257 37 77 (cuntanschibel da las 8.30 fin las 10.00), e‑mail Matthias.Wielatt@tba.gr.ch

Responsabladad: Uffizi da construcziun bassa